बर्च दुर्घटना : चवकशी समितीक एक सप्तकाची मुजत वाड

भांगरभूंय | प्रतिनिधी

पणजीः बर्च बाय रोमिओ लेन क्लबाच्या उज्याची चवकशी अजून पुराय जावंक नाशिल्ल्यान दंडाधिकारी समितीक एक सप्तकाची मुजत वाडोवन दिल्या. सरकारी अधिकारी तशेंच सरपंच आनी जमनीच्या धनयांची चवकशी अजून पुराय जावंक नाशिल्ल्यान अहवाल सादर करपाक कळाव जातलो. समितीन मुजत वाड मागिल्ल्याची म्हायती चवकशी समितीचे अध्यक्ष अंकित यादव हांणी दिली.
बर्च बाय रोमिओ लेन क्लबाक शेनवारा, 6 डिसेंबराक लागिल्ल्या उज्यांत उज्यांत 25 जाणांक मरण आयिल्लें.
ह्या दुर्घटनेची चवकशी करपा खातीर उत्तर गोंय जिल्होधिकारी अंकित यादव हांच्या अध्यक्षते खाला 4 वांगड्यांची चवकशी समिती स्थापन केली. चवकशी समितीक सप्तका भितर अहवाल सादर करपाक सांगिल्लें. एक सप्तकाची मुजत आयज सोमारा सोंपली. पूण तातूंत एक सप्तकाची मुजत वाड केल्या.
तिकम सिंग वर्मा, दक्षीण गोंय पुलीस अधीक्षक, आशुतोष आपटे, फोरेन्सीक सायन्स, संचालक राजेंद्र हळदणकार, उपसंचालक, उजो पालोवपी आनी आपत्कालीन सेवा हे समितीचे हेर वांगडी आसात.
प्रदुशण नियंत्रण मंडळाची तेन्नाची वांगडी सचीव शमिला मोंतेरो, हडफडेंचे सरपंच रोशन रेडकार, जमनीचो मूळ धनी प्रदीप घाडी आमोणकार, सुनील दिवकार हांचे कडेन चवकशी केल्या. हेरां कडेन चवकशी करपा वांगडाच कागदपत्रां तपासपाचें काम सुरू आसा.