सर्जन कित्याक घालतात निळो वा पाचवो गावन

भांगरभूंय | प्रतिनिधी

अाॅपरेशन थिएटरांत भितर सरताच सगळ्यांत पयली गजाल नदरेक पडटा ती म्हणल्यार सर्जनाचो निळो वा पाचवो गावन. तुमी केन्नाच सर्जनाक तांबड्या, हळदुव्या वा धव्या गावनांत पळयिल्लो आसचो ना. हें अशें कित्याक?
हाचें पयलें कारण- ‘आफ्टरइमेजी’चो भिरांकूळ खेळ
जेन्ना तुमी वराचीं वरां तांबडो रंग (रगत) पळयतात तेन्ना दोळ्यांची रेटिना थकता. ते उपरांत तुमी जेन्ना धव्या वा लेव रंगा कडेन पळयतात तेन्ना तकलेंत तांबड्याचो उरफाटो रंग म्हणल्यार पाचवो दिसपाक लागता. हाका ‘Complementary Afterimage’ म्हणटात. आदल्या काळार दोतोर धव्या कोटांत ऑपरेशन करताले. तांबडें रगत पळोवन पळोवन जेन्ना ते धवी वणत वा धवो गावन पळयताले तेन्ना तांकां पुराय कूड पाचवी दिसताली. हाका लागून घुंवळ येताली आनी हात थरथरताले. हाका लागून कितलेशेच खेपे सर्जन चुकीचें कातरताले. 1914 ते 1920 ह्या काळांत अमेरिका- युरोपांत कितल्याशेच सर्जिकल अपघात फकत ह्याच कारणाक लागून जाल्ले. ते टाळपा खातीर सर्जनाक धव्या बदल्या पाचवे गावन घालपाक लागले.
दुसरें कारण- तांबडो आनी पाचव्या- निळ्याची दुस्मानकाय
कलर व्हिलांत तांबड्याचो थेट दुस्मान पाचवो- निलो सा. जर फाटभुंयेर पाचवो- निळो रंग आसत जाल्यार तांबडें रगत ताचेर सगळ्यांत वेगळें आनी स्पश्ट दिसतलें. धव्या वा हळदुव्याचेर रगत ‘ब्लेंड’ जाता आनी कळचना, कितलें व्हावता. निळ्या- पाचव्या रंगाचेर रगत चकचकता. हाका लागून सर्जनाक रोखडेंच कळटा, खंयच्यान चड रगत व्हावता (ब्लिडींग) जाता.
तिसरें कारण- दोळ्यांत मेळटा थाकाय
खूब खेपे ऑपरेशन 8 ते 10 वरां लेगीत चलता. पाचवो- निळो रंग दोळ्यां खातीर सगळ्यांत उणे स्ट्रेनींग आसता. हांकां कूल कलर्स म्हणटात, जे रक्तदाब आनी तणाव उणो करतात. नासा लेगीत आपल्या कंट्रोल रुमांत पाचव्या- निळ्या रंगाचो वापर करतात, जे वरवीं शास्त्रज्ञ वराचीं वरां लक्ष केंद्रीत करपाक शकतले.
आयच्या काळांत कितलीशींच हॉस्पिटलां कलर कोड वापरतात. तातूंत वेगवेगळ्या विभागां खातीर वेगळो रंग दवरला. जनरल सर्जरीचे सर्जन पाचवो गावन घालतात. न्यूरो सर्जरी करपी निळो जाल्यार पिडियाट्रीक वाले गुलाबी जावं लेव निळो गावन घालतात. ताचेंय एक खास कारण आसा. तातूंतल्यान दुयेंतीक लेगीत कळटा, मुखार खंयच्या विभागाचो दोतोर आसा.