भांगरभूंय | प्रतिनिधी
पणजी : राज्यांत फाटल्या पांच वर्सांत रस्तो अपघातांत १२९६ जाणांक मरण आयिल्लें. हातुंतल्या ५८७ दुचाकी चालकांनी (४५.२९ टक्के) अपघातावेळार हॅल्मेट घालूंक नाशिल्लें. जाल्यार ७१ चार चाकी चालकांनी (५.४७ टक्के) सीट बॅल्ट बांदूंक नाशिल्लो. केंद्रीय रस्तो येरादारी आनी महामार्ग मंत्री नितीन गडकरी हांणी राज्यसभेंत दिल्ले लेखी जापेंतल्यान ही म्हायती मेळ्ळ्या. हे विशीं खासदार नरेन दास गुप्ता हांणी प्रस्न विचारिल्लो.
जापेंतले म्हायती प्रमाण, राज्यांत २०२० वर्सा २,३७५ रस्तो अपघातांत २२३ जाणांक मरण आयिल्लें. हातुंतल्या ११५ वाहन चालकांनी हॅल्मेट, जाल्यार ७ जाणांनी सीटबेल्ट घालूंक नाशिल्लो. २०२१ वर्सा २,८४९ रस्तो अपघातांत २२६ जाणांक मरण आयिल्लें. हातुंतल्या १०९ वाहन चालकांनी हॅल्मेट जाल्यार १९ जाणांनी सीटबेल्ट घालूंक नाशिल्लो. २०२२ वर्सा ३,०११ रस्तो अपघात जाले. हातूंत २७१ जाणांक मरण आयिल्लें. हातुंतल्या १११ वाहन चालकांनी हॅल्मेट जाल्यार १० जाणांनी सीटबेल्ट घालूंक नाशिल्लो.
राज्यांत २०२३ वर्सा २,८४६ रस्तो अपघात जाले. हातूंत २९० जाणांक मरण आयिल्लें. हातुंतल्या १३७ वाहन चालकांनी हॅल्मेट जाल्यार २० जाणांनी सीटबेल्ट घालूंक नाशिल्लो. जाल्यार २०२४ वर्सा २,६८२ रस्तो अपघातांत २८६ जाणांक मरण आयिल्लें. हातुंतल्या ११५ वाहन चालकांनी हॅल्मेट, जाल्यार १५ जाणांनी सीटबेल्ट घालूंक नाशिल्लो. वयल्या काळांत पुराय देशांत रस्तो अपघातांत ८ लाख १० हजार ९१३ जाणांक मरण आयिल्लें.मरण आयिल्ल्यां मदीं २.४७ लाख जाणांनी हॅल्मेट घालूंक नाशिल्लें. जाल्यार ७९ हजार ८४० जाणांनी सीटबेल्ट घालूंक नाशिल्ल्याचें जापेंत म्हणलां.
राज्यांत वयल्या काळांत रस्तो अपघातांत जाल्ल्या वट्ट मरणां मदले ११६५ (९० टक्के) वाहन चालक अतिवेगान वाहन चलयताले. २०२० वर्सा मरण आयिल्ले १८१ वाहन चालक अतिवेगान वाहन चलयताले. २०२१ वर्सा २०३, २०२२ वर्सा २४०, २०२३ वर्सा २७० जाल्यार २०२४ वर्सा २७१ मरण आयिल्ले वाहन चालक अतिवेगान वाहन चलयताले अशें जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
