भांगरभूंय | प्रतिनिधी
पांच टी-20तली तिसरी मॅच आयज धर्मशालांत जातली. सध्या माळ 1-1 अशी बरोबरींत आसा. भारता मुखार माळेंत पुनरागमन करपाचें व्हड आव्हान आसा. दुसरे मॅचींत व्हडा फरकान हार घेवची पडल्या उपरांत भारताक म्हत्वाच्या प्रस्नाच्यो जापो सोदच्यो पडटल्यो. देखीक दक्षीण आफ्रिका पंगडाच्या घटमूट फास्ट बॉलींग आक्रमणा आड अक्षर पटेलाक बॅटींगेक वयले सुवातेर धाडप योग्य आशिल्ले व्हय, सूर्यकुमार यादवाक फॉर्मांत येवपाक कितें करचें पडटलें, दक्षीण आफ्रिकेच्या मार्को यानसेनाच्या आव्हानाक तोंड दिवपाक भारताची काय रणनिती आसतली अशे साबार प्रस्न भारताच्या पंगड वेवस्थापना मुखार आसात.
चंदीगडांत जाल्ले माळेंतले दुसरे मॅची पयलीं जसप्रीत बुमरा आड कोणेनूच चार सके मारूंक नाशिल्ले. पूण, डोनोवन फरेरान बुमराच्या स बॉलांचेर 17 धांवड्यो केल्यो.
पयल्या दोन मॅचींनी सुरवातीक धपके बसल्या उपरांत मदले फळयेंत तिलक वर्मा आनी हार्दिक पांड्या हांणी डाव सांबाळपाक म्हत्वाचें योगदान दिलां. ओपनर अभिषेक शर्मा पंगडाचे पावरप्ले रणनितीचो मुख्य वांटेकार आसा. ताच्या कडल्यान परतून जलद सुरवात करून दिवपाची आस्त आसतली. शुभमन गिल आनी सूर्यकुमार यादव हांकां शक्य तितके बेगीन फॉर्मांत येवपाची गरज आसा.
बुमरा भशेन अर्शदीप सिंगान लेगीत दुसरे मॅचींत खूब धांवड्यो दिल्ल्यो. अक्षर पटेल आनी वरुण चक्रवर्ती हांणी पयल्या दोन मॅचींनी विकेटी घेतल्यात. तशेंच मदल्या ओव्हरींनी धांवसंख्येचेर नियंत्रण दवरिल्लें. आयचे मॅचींत लेगीत तांच्या अशाच प्रदर्शनाची आस्त आसतली.
दक्षीण आफ्रिका पंगडान फाटले मॅचींत जबरदस्त बॅटींग केल्ली. आयचे मॅचींत लेगीत तांच्या पंगड वेवस्थापनाक तश्याच प्रदर्शनाची आस्त आसतली. दोनूय पंगड आयची मॅच जिखून मानसीक रितीन आघाडी घेवपाची घेवपाक इत्सूक आसतले.
धांवसंख्येची राखण करपाक धर्मशालाच्या स्टेडियमाचेर खूब कठीण जाता. ह्या मैदानाचेर जाल्ल्या फाटल्या 6तल्या 4 मॅचींनी मोखीचो फाटलाव करपी पंगड जिखला.
भारताचो संभाव्य पंगड: 1 अभिषेक शर्मा, 2 शुभमन गिल, 3 सूर्यकुमार यादव (मुखेली), 4 तिलक वर्मा, 5 जितेश शर्मा (विकेटकीपर), 6 हार्दिक पांड्या, 7 शिवम दुबे, 8 अक्षर पटेल, 9 अर्शदीप सिंग, 10 वरुण चक्रवर्ती, 11 जसप्रीत बुमरा.
दक्षीण आफ्रिकाचो संभाव्य पंगड: 1 क्विंटन डी कॉक (विकेटकीपर), 2 एडन मारक्रम (मुखेली), 3 ट्रिस्टन स्टब्स/रीजा हॅण्ड्रिक्स, 4 डेवाल्ड ब्रेविस, 5 डेविड मिलर, 6 डॉनोवन फरेरा, 7 मार्को यानसन, 8 जॉर्ज लिंडे/केशव महाराज, 9 लुंगी एन्गिडी/कॉर्बिन बॉश, 10 ऑटनील बार्टमॅन, 11 लुथो सिपामला/अनरिख नॉर्खिये.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
