भांगरभूंय | प्रतिनिधी
फाटल्या पन्नास वर्सांत कोंकणी साहित्यांत दर वर्सा नव्या नव्या पुस्तकांची सातत्यान भर पडत आसा. ह्या पुस्तकां भितर कथा, कविता, कादंबरी, नाटक, तशेंच ललित साहित्याची पुस्तकां आसतात. बाल साहित्य लेगीत उजवाडाक येता. खुब उमेदीची गजाल ही. पूण अजून अशे जायते विशय अशे आसात जंय बरोवपा सारकें खुब आसा. आनी ताची खरी गरज आसा. आयज कोंकणीतल्यान केजी ते पिजी मेरेन विद्यार्थी शिकतात. तांचे खातीर वेगवेगळ्या विशयांवेलें लेखन कोंकणीतल्यान वाचूंक मेळपाची वेवस्था जावपाक जाय. गोंयकार वेगवेगळ्या विशयाचे शिकप घेवन आपआपल्या वेवसायांत यशस्वी जाल्यात. देखीक दोतोरकी, वास्तुविशारद, उद्योग, कारखानदार, शिक्षक, प्राध्यापक, विज्ञानिक, कृषीविज्ञान, संगणक तंत्रज्ञान अश्या साबार विशयांचेर अभ्यासपूर्ण माहिती दिवपी पुस्तकां येवपाक जाय. कोंकणीत अशे प्रयोग अजिबात जावंक ना अशें ना. डॉ. प्रकाश शेट्ये, डॉ. भिकाजी घाणेकार हांणी वैजकी मळावेल्या विशयांचेर हे आदीं सातत्यपुर्ण लेखन केलां. आयज डॉ.अनंत हेदे हांचे ‘ फॅमिली डॉक्टर ‘ हें पुस्तक उजवाडाक येता. हेमा नायक हांणी डॉ . प्रेमानंद रामाणी हांचे ‘ताठ कणा’ ह्या पुस्तकाचो अणकार केला.
डॉ. भूषण भावे हांणी चवथीच्या माटोळेक बांदतात त्या फळां आनी वनस्पतींची माहिती दिवपी सुंदर पुस्तक बरयलां. डॉ. प्रकाश पर्येकार हांणी पुरण शेतीचेर कादंबरी बरयल्या, पुंडलिक नायक हांची अच्छेव कादंबरी आनी खण खण माती हें नाटक मिना उद्योगान जावपी पर्यावरण आनी समाज मनाची हानी हाचेर उजवाड घालता. उदयबाब भेंब्रे आनी डॉ. कस्तुरी मोहन पै हांच्यो कादंबरी पुर्तुगेज काळांतल्या इतिहासाचेर उजवाड घालतात. आनी आसात. पुण ही जंत्री वाडत रावूंक जाय. हालींच कोचीनांत जाल्ल्या कोंकणी साहित्य संमेलनांत प्रा. डॉ. वामन नायक हांणी बरयल्लें ‘वित्तीय साक्षरताय’ हें पुस्तक उजवाडाक आयलां. हो विशय केवळ विद्यार्थ्यां खातीर म्हत्वाचो अशें न्हय. सर्वसादारण मनशाक दिसपट्टे जिणेंत वेव्हारा खातीर उपेगाक पडपी विशय हो.
एक काळार शेअर बाजार हो जुगारी लोकांचो बाजार असो गैरसमज समाजांत पातळिल्लो. ताका लागून सर्वसामान्य गुंतवणूकदार शेअर बाजारापासुन पयस रावतालो. संगणकीकरण जावंचे आदीं लोकांची अर्थीक मळार फटवणूक लेगीत खुब जाताली. पूण उपरांत म्युच्युअल फंड आयले. ह्या फंडांनी शिस्तबद्ध गुंतवणूक करून येणावळ कशी वाडोवं येता ताचे शास्त्र लोकांखातीर उगतें केलें. पद्धतशीर गुंतवणूक येवजण सुरू केली. तशेंच पद्धतशीर पयशे काडपाची येवजण बाजारांत हाडली. वर्सान वरस बाजारांत चलनाचे मोल उणे जायत वता. देखून अवमूल्यन जावपी चलनाकडे सर्त करतले जाल्यार अदीक कळंतर दिवपी वित्तीय वेवस्थेचो सोद घेवप आनी अश्या जाग्यार गुंतवणूक करप गरजेचें थारता. खुब लोकांक हे विशीं खोलायेन जाणून घेवपाची इत्सा आसता. हेर भासांनी ह्या विशयाचेर जायते लेखन जाता. जायतीं पुस्तकां उपलब्ध आसात. प्रो. वामन नायक हांच्या ‘वित्तीय साक्षरताय’ ह्या पुस्तकान ही माहिती जाणून घेवप आतां सोपें जातलें. केवळ शेअर बाजार ह्या विशया पुरते हें पुस्तक मर्यादीत ना. बँकेच्या संबदीत सगळे विशय. आरोग्य विमो तशेंच आयुर्विमो, पोस्टाच्यो वेगवेगळ्यो येवजणो, इतर वित्तीय संस्थांच्यो येवजणो ह्या सगळ्या विशायांचेर तपशीलवार माहिती ह्या पुस्तकांत वाचूंक मेळटा. कोणाकूय घर बांदपाक रीण काडूंक जाय वा वाहन खरेदी, शेती, उद्योग, वेपार कसलेंय रीण काडपा खातीर कितें करचे पडटा ताची सविस्तर माहिती पुस्तकांत मेळटा. एके तरेचो वित्तीय खजिनो हो.
दोनशें चार पानाच्या ह्या पुस्तकांत अर्थीक वेव्हाराविशीं गरजेची आनी म्हत्वाची माहिती वाचूंक मेळटा. विश्व कोंकणी केंद्राच्या मायकल डि सोझा व्हिजन कोंकणी ह्या कार्यक्रमा अंतर्गत हें पुस्तक पणजेच्या क्युरेट बुक्स हे प्रकाशन संस्थेन उजवाडायलां. पुस्तकाची मांडावळ, कागद, फाँट खुब बरो आसा. सराचे हें पुस्तक चडांत चड लोक वाचतले हाची म्हाका खात्री आसा.
प्रो. वामन नायक म्हजे प्रोफेसर. पणजे लिसेवाचेर श्रीनिवास सिनाय धेंपो वाणिज्य महाविद्यालयांत सर आमकां शिकयताले. उपरांत ते आमच्या कॉलेजीचे प्राचार्य जाले. त्या उपरांत पुणेच्या सिंहगड वाणिज्य महाविद्यालय आनी आय. एस. बी. एण्ड. एम. कॉलेज ऑफ कॉमर्स हांगा तांणी प्राचार्य म्हणुन काम केलां. तांणी अर्थशास्त्राचेर सुमार धा पुस्तकां इंग्रजीत बरयल्यात. ह्या विशयाचेर तांचे प्रभुत्व आसा. अश्याच योग्य त्या मनशांनी तांचे तांचे प्रभुत्व आशिल्ल्या वेगवेगळ्या विशयांवेली पुस्तकां बरोवन मायभाशेक गिरेस्त करूंक जाय. वामन सरांचे जितलें अर्थ शास्त्राचे शिकप आनी ज्ञान आसा तितलोच तांचो कोंकणी भाशेचेर मोग आसा. ‘वेध फुडाराचो’ हें तांचें अर्थ शास्त्रावेले पुस्तक राजभाशा संचालनालयान उजवाडायलां.अर्थशास्त्र आनी वित्तीय साक्षरतायेचेर ते फाटलीं साबार वर्सां सातत्यान लेखन करतात. हालींच तांका धि गोवा हिंदू असोसिएशनाचो भो. उदय भेंब्रे कोंकणी ग्रंथ पुरस्कार फावो जाला.सरान प्रिंट आनी इलेक्ट्रॉनिक मिडिया खातीर सल्लागार म्हणून काम केलां. आतां अर्थशास्त्र, समाज शास्त्र, प्रशासन, शिक्षण, संविधान अश्या वेगवेगळ्या उतरांचो अर्थ कोंकणी, इंग्लीश, आनी हिंदीतल्यान उजवाडा येवपाच्या वाटेर आसा. आमचें संविधान कशें घडलें हेविशी जाणून घेवपा खातीर सर खुब वाचन करतात हें हांव जाणा. ह्या अभ्यासांतल्यान फुडाराक एक तोलामोलाचे पुस्तक कोंकणीत येवंचे अशी आस्त बाळगितां. सराक बरें आरोग्य लाबूं आमी तांचे हातसून आनीक खुब कोंकणी पुस्तकां बरोवन आमकां वाचूंक मेळूं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
