भांगरभूंय | प्रतिनिधी
म्हापशें: धुळेंरांतल्या मेसर्स शेटये व्हिजन हॉस्पिटलाची ॲम्ब्युलन्स चोरिल्ल्या प्रकरणांत प्रदीप देवू खलप (पीर्ण, बार्देश) हाचे आड म्हापशें पुलिसांनी गुन्यांव नोंद केलो. सध्या दुबावीताचेर मानसीक हॉस्पिटलांत उपचार चलतात.
ही घडणूक बिरेस्तारा, 11 तारखेर सकाळीं 5.50 वरांच्या सुमाराक घडली. चोरिल्ले ॲम्ब्युलन्साचे मोल 10 लाख रुपया आसा. हॉस्पिटलाचे प्रशासक इंतेखालो अब्बास शेख हांणी हे संबंदी पुलिशेंत कागाळ केल्ली.
हॉस्पिटला भायर जीए 03 एएच 4250 क्रमांकाची मारुती इको ॲम्ब्युलन्स उबी आशिल्ली. दुबावितान ॲम्ब्युलन्स सुरू केली आनी ती घेवन पळ काडलो. दुबावीत ॲम्ब्युलन्स घेवन सरळ बांबोळेच्या मानसीक हॉस्पिटलांत गेलो. उपरांत थंयच्यान तो तीच ॲम्ब्युलन्स घेवन परतून पिर्णा आपल्या घरा वतालो. त्या वेळार म्हापशें पुलिसांनी रेवोडा हांगा ॲम्ब्युलन्स थांबयली आनी दुबाविताक ताब्यात घेतलो. उपरांत पुलीस तपासांत दुबावीत मानसीक दुयेंत आशिल्ल्याचें कळ्ळें.
मजगतीं हॉस्पिटलाच्या ॲम्ब्युलन्साच्या ड्रायव्हरान चावी ॲम्ब्युलन्सीकूच लावन दवरिल्ली. दुबावीत हो हाचे पयलीं खाजगी हॉस्पिटलांत ड्रायव्हर म्हणून काम करतालो. देखून ताका ॲम्ब्युलन्स चलोवपाची सवय आशिल्ली. म्हापशें पुलीस फुडलो तपास करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
