भांगरभूंय | प्रतिनिधी
पणजीः स. मनोहर पर्रीकार हे आधुनिक गोंयचे प्रणेते आशिल्ले. तांणीच आधुनिक गोंयची बुन्याद घाली. तांणी सुरू केल्लीं उदरगतीचीं कामां आमच्या कार्यकाळांत पुराय जालीं. ही अभिमानाची गजाल अशें मुख्यमंत्री, डॉ. प्रमोद सावंत हांणी सांगलें. शेनवारा पर्रीकार हांच्या जयंती निमतान मिरामार तांच्या स्मारकाक भेट दिली. ह्या वेळार भाजपाचे प्रदेश अध्यक्ष दामू नायक, केंद्रीय मंत्री श्रीपाद नायक, उत्पल पर्रीकार आनी हेर वांगडी हाजीर आशिल्ले.
भाजपा फुडारी मनोहर पर्रीकार हांणी आपल्या कार्यकाळांत जायते नवे प्रकल्प सुरू केल्ले. गोंयांत मुळावी बांदावळ तयार करपा खातीर तांणी वेगवेगळीं कामां सुरू केल्लीं. तातूंतली कांय ते आसतनाच पुराय जाल्लीं. मुख्यमंत्री जाले उपरांत तांणी सुरू केल्लीं कामां हांवें पुराय केल्यांत अशें मुख्यमंत्र्यान सांगलें. मुळाव्या साधनसुविधांचे नदरेन गोंय आयज वेगळ्याच पांवड्यार पावलां. हे खातीर आमकां स्व. पर्रीकार हांचो आशीर्वाद मेळ्ळा. आयज आमी तांकां गोंय सरकारा वतीन आनी लोकां वतीन आर्गां ओंपतात.
स्व. पर्रीकार हांणी केल्लो वावर लोकांक सदांच याद उरतलो. गोंया खातीर तांणी केल्ली कामां ही तांच्या कामांची पावती आसा. मोपा विमानतळ, अटल सेतु सारके प्रकल्प गोंयांत हाडून गोंय आधुनीक केलें. तशेंच तांणी दयानंद समाजीक सुरक्षा येवजण सुरू केली. तांच्या विचारांचो आनी तांच्या वावर पद्धतीचो दायज आमी मुखार व्हरतात अशें दामू नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
