शिक्षक उमेदवारांच्या भावनां कडेन खेळचें न्हय

भांगरभूंय | प्रतिनिधी

कितेंय केल्यार पचता ही संवय जाल्या. चार हजार भुरग्यांचेर हो अन्याय. गंभीरपणान अभ्यास करपी उमेदवारांक त्रास आनी मनस्ताप जाल्यात.

काणी काणी कोतवा, हो तुमचो कालचो अग्रलेख खूब आवडलो. ज्वलंत प्रासंगिक विशयावेलें भाष्य तातूंत आसा. कोंकणीचीं खेबाडां, फकांडां चलल्यांत आनी घरचेच लोक, घरचेच भेदी बेपर्वा वृत्तीन सगळेंच कॅज्युअली घेवन कशे विटयतात ताचेर तुमी बडी मारल्या. ते खातीर तुमचें अभिनंदन.
कोंकणी कवी आनी शिक्षक प्रकाश नायक हांणी हो प्रस्न धसाक लायलो, आवाज उठयलो म्हूण तांचीय तोखणाय. आज प्रकाशबाब सोडल्यार कोंकणीच्यो संस्था उदकांत पडिल्ल्या माराणांवरी जाल्यात. कोण वेंचणुकेच्या प्रचारांत व्यस्त आसा. कोण आपणाक जाय तेन्नाच आपल्या मनशां खातीरूच आवाज काडटा. खट्ट खूट्ट जायना फुडें लांबचे लांब निशेद पत्रकां काडपी लोक आतां कांयच उलयनात. चांटे पावलाक साद्या साद्या कारणा खातीर पत्रकार परिशदो घेवपी लोक उणे नात. कोंकणीचेर अन्याय जावपी ह्या प्रस्नाचेर प्रकाशबाब सोडल्यार आनीक कोणाक आवाज उठयन दिसना. घडये तांकां कोंकणीचें खरें प्रेम आनी निष्ठा नासत!
त्या पेपरांत इतल्यो चुको आसात की तांकां घोडचुको म्हणच्यो पडटल्यो. नवे शिक्षक भुरग्यांक शिकोवपाचे आसात. कायम नोकरी ही. तातूंत आयुश्याचो फुडार निंबून आसा. ते खातीर निवड परिक्षा जाल्या. तो पेपर काडपी पेपर सेटर इतलो कच्चो आनी गोवा बोर्ड हें मंडळ इतलें घाळ हें पळोवन धक्को बसपाचो. पोजडें, अश्लील, अमंगळ हें सगळें कांय मनशां फाटल्यान सोंपलें. ते ‘कालेतीक’ प्रामाणीक रावन पेपर काडटल्यान तो रचला अशेंय कांय लोक सोशल मिडियाचेर म्हणटात.
हातूंत चूक ना. कारण कोंकणी नाटकां तिंवूय बी सर्तीचीं जातूंत रंगमंचाचेर बाश्कळ पोजडे देखाव दाखयतात ते पळेल्यार थेटरांत बशिल्ल्या आमकां बायलांक कोणाकूच हुस्को जायना हाचो म्हाका हुस्को जाता. बायलांचो रेश्पेत, स्त्री दाक्षिण्य ह्या विशयाचेर व्हडल्यो व्हडल्यो फटासो सगळे मारतात. आतां हो पोजडो पेपर शिक्षिकांनी सोडोवपाचो व्हय? कोणाक पडलां?
तुमी तुमच्या अग्रलेखांत म्हणलां ते प्रमाण उतारे दिवपा खातीर घे म्हूण नामनेच्या लेखकांचे निबंद, कथा आसात. आपणेच आपली विकृत लायकी दाखोवन कथा रचोवप तिवूय हळशिकावणी हाचो निशेध जावंकूच जाय. जायते तांकीवंत अनुवादक आसात. पूण बोर्डाक पडिल्लें ना. आपल्याच कळपांतल्या वळखीच्या कोणाकूय शाबीक वा बाबीक पेपर काडूंक सांगप आनी दादागिरी करप. नैतिकता आनी संहिता म्हूण कांय अलिखित गजाली आसतात. बायलांचो अनादर करूंक फावना. शिक्षणाक एक चौकट, एक आटी आसता सोज्वळपणाची. बायलांचो स्वैराचार, अनैतीक संबंद दाखोवपी उतारो दिवन बोर्डाक कितें मेळ्ळें? बायलांच्या सशक्तीकरणाचेर भर दिवन आज सरकार तांकां थाकाय, सुरक्षा बळगें दित आसा. गोवा बोर्ड बायलांचें विद्रुपीकरण करता. हो बोर्ड सरकारी अशें दिसना. निशेद जावंक जाय.
मजगतीं, पोजडेपणां दाखोवपी कोंकणी नाटकांनी हालींसराक एक वायट गजाल उक्ताडार हाडली. दोन तीन वर्सां हेर साहित्यकृतींवेल्यान कॉपी मारून कथीत नाटकां बरोवपी एका तरणाट्याची साहित्यचोरी वाऱ्यार पडली. पुराव्यां सयत गांवार पडली. जाणकारांनी सविस्तर लेख बरोवन लेगीत ताचेर कला अकादमीन दखल घेवन कांयच कारवाय करूंक ना. सर्तींत वांटो घेवपी संस्थाय कॉपीमास्टराक इनामां दिलीं, आपणाचेर अन्याय जालो म्हूण साहित्यचोरां आड आवाज करिनात. त्योवूय कोंकणी संस्थां भशेन थंड पडल्यात. कॉपी मारपी नाटकांक लागून कोंकणी नाटक सर्त 40 वर्सां फाटीं गेल्या. शिक्षकां खातीरचो गोवा बोर्डाचो हो पेपर पळेत जाल्यार कोंकणी शिक्षणाचें उत्तरदायित्व सांबाळपी बोर्डान कोंकणीक कितलीं दशकां फाटीं व्हेली तें समजप कठीण. बोर्डान कला अकादमी भशेन गुळूगुळू धोरण आपणावन विशय पॉल करचो न्हय. हो सबंद पेपर छिद्रांनी भरला. तो परत घेवचो काय कितें तें बोर्डान घोशीत करचें. शिक्षक उमेदवारांच्या भावनां कडेन खेळचें न्हय. कितेंय केल्यार पचता ही संवय जाल्या. चार हजार भुरग्यांचेर हो अन्याय. गंभीरपणान अभ्यास करपी उमेदवारांक त्रास आनी मनस्ताप जाल्यात. आंदोलन चालू जावचें. नाजाल्यार कोंकणींत कितेंय चलता ही मस्ती चालू उरतली.
फक्त संस्था वेंगावप, हायजॅक करप, कदेलां तापोवप आनी आपणाक जाय तें करप असल्यांक ह्यो गजाली दिसनात? कांय बायलो वैजकी विशयांचेर व्याख्यानां दितालीं. आतां बायलांचे सेंटीमेट दुखवल्यात तें तांकां खबर ना, काय पडून वचूंक ना? समर्पक अग्रलेखा खातीर तुमकां परत परबीं.

सरीता हळर्णकार
केपें