भांगरभूंय | प्रतिनिधी
पणजी : गांवगिर्या वाठारां सयत दर्यादेग वाठारांत स्टारलिंक कंपनी वतीन हायस्पीड इंटरनॅट सेवेची पुरवण जातली. इंटरनॅट सेवे सयत गोंयांत डिजिटल सुविधा निर्माण करपाचेर लेगीत चर्चा जाली. स्टारलिंक कंपनीचे वरिश्ठ बिझनेस ऑपरेशन्स मुखेली लॉरेन ड्रेयर हांचे कडेन मुख्यमंत्री डॉ. प्रमोद सावंत हांची चर्चा जाली. ह्या वेळार म्हायती तंत्रज्ञान मंत्री रोहन खंवटे हाजीर आशिल्ले.
गोंयांत डिजिटल सेवा उपलब्ध करपा सयत मुळाव्यो सुविधा तयार करपाक स्टारलिंक (स्पेस एक्स) कंपनी इत्सूक आसात. हे विशीं कंपनीची वरिश्ठ बिझनेस ऑपरेशन्स मुखेली लॉरेन ड्रेयर हांचे कडेन चर्चा जाली, अशी म्हायती डॉ. सावंत हांणी दिली.
शिक्षणीक संस्था, भलायकी केंद्रां, नुस्तेमारी तशेंच गांवगिर्या वाठारांत सॅटलायटाचेर आदारीत इंटरनॅट सेवेची पुरवण स्टारलिंक वतीन जातली. पर्यटन, मॅरिटायम ऑपरेशन्स आनी आपत्ती वेवस्थापनाचे कार्यावळींत लेगीत स्टारलिंकच्या पालवान मुळाव्यो सुविधा तयार जातल्यो. गोंयांत गांवगिर्या वाठारांत इंटरनॅट सेवा सारकी ना. अजून लेगीत खूब कडेन मोबायलाक रेंज मेळना. हाचो मार शिक्षण संस्था तशेंच भलायकी सेवेक बसता. हे फाटभुंयेर स्टारलिंकान सॅटलायटाच्या आदारान इंटरनॅट सेवा दिली जाल्यार गांवगिर्या वाठारांतल्या लोकांक थाकाय मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
