लुथरा भावांचो पासपोर्ट रद्द

भांगरभूंय | प्रतिनिधी

गोंय पुलिशेचो पंगड वतलो थायलॅण्ड

भांगरभूंय । प्रतिनिधी

पणजी : बर्च बाय रोमिओ लेन क्लबाचे धनी सौरभ आनी गौरव लुथरा ह्या दोगांचो पासपोर्ट रद्द केला. ते उपरांत थायलॅण्ड रॉयल पुलिसांनी त्या दोगांक बिरेस्तारा ताब्यांत घेतले. ते प्रमाण त्या दोगांक तीन- चार दिसांत गोंयांत हाडटले. ते खातीर गोंय पुलिसांचो एक पंगड थायलॅण्ड वतलो.

शेनवारा 6 डिसेंबराक मध्यानरातीर हडफडेंच्या बर्ज बाय रोमिओ लेन क्लबाक उजो लागिल्लो. ते दुर्घटणेंत 25 जाणांक मरण आयिल्लें. हे दुर्घटणे मजगतीं मध्यानरातीर 1.17 वरांच्या सुमाराक क्लबाचे धनी सौरभ आनी गौरव लुथरा ह्या दोगांनीय थायलॅण्डाक वचपा खातीर विमानाची तिकेट बूक केली. आयतारा 7 डिसेंबराक फांतोडेर 5.20 वरांच्या सुमाराक ते दोगूय थायलॅण्डाक गेले.

दुर्घटणे उपरांत पळून गेल्ल्या लुथरा भावांचेर कारवाय करचे खातीर गोंय पुलिसांनी केंद्रीय गुन्यांव अन्वेशण विभाग (सीबीआय), विदेश मंत्रालय आनी गृह मंत्रालय, इंटरपोलाची संयुक्त मजत घेतली. तशेंच त्या दोगांचोय पासपोर्ट रद्द करून घेतलो. ते प्रमाण, थायलॅण्ड रॉयल पुलिसांनी त्या दोगांक बिरेस्तारा ताब्यांत घेतले. पासपोर्ट रद्द केल्ल्यान त्या दोगांक थंयच्या पुलिसांनी स्थानबंद केंद्रांत दवरल्यात. हेर प्रक्रिया केले उपरांत त्या दोगांक भारतांत डिपोट करतले. ते खातीर गोंय पुलिसांचो एक पंगड थायलॅण्डांतल्या विमानतळाचेर आशिल्ल्या इमिग्रेशन सेंटरांत वचीन त्या दोगांक ताब्यांत घेतले आनी उपरांत गोंयांत हाडटले. हे प्रक्रियेक तीन ते चार दीस लागतले. ताका लागून त्या दोगांक तीन ते चार दिसांनी गोंयांत हाडटले, अशी म्हायती वरिश्ठ पुलीस अधिकाऱ्यान दिल्या.

मजगतीं, दुर्घटणे उपरांत हणजूणें पुलिसांनी गुन्यांव दाखल करून क्लबाचे धनी सौरभ आनी गौरव लुथरा ह्या दोगां आड कारवाय सुरू केली. हाची दखल घेवन त्या दोगांनी दिल्लींतल्या रोहिणी न्यायालयांत ट्रान्झीट अटकपूर्व जामीन दिवपाची मागणी करपी अर्ज दाखल केल्ले. घडणुकेची दखल घेतली जाल्यार ती गंभीर आसा. अशें आसतना लुथरा भावांची वागणूक आनी ताचेर लायिल्ल्या आरोपांचे स्वरूप गंभीर आसा. अशें निरिक्षण नोंद करून रोहिणी न्यायालयान त्या दोगांचो ट्रान्झीट अटकपूर्व जामीन दिवपाक न्हयकार दिवन अर्ज भायर मारले.