भांगरभूंय | प्रतिनिधी
पणजी: हडफडेंच्या नायट क्लब घडणुकेची गोंय मानवाधिकार आयोगान दखल घेतल्या. हे घडणुकेंत २५ जणांचो बळी गेल्ल्यान, आयोगान सरळ मुखेल सचीव आनी पुलीस महासंचालकांक नोटीस धाडल्या. ह्या अधिकार्यांक तपशीलाचेर जाप दाखल करून ६ जानेवारी दिसा आयोगा मुखार हाजीर रावपाचे निर्देश दिल्यात.
ऑल इंडिया लॉयर्स युनियनच्या गोवा युनिटान मानवाधिकार आयोगा कडेन ही कागाळ दाखल केल्ली. हे कागाळींत अग्निकांडांत जाल्ल्या मरण आयिल्ल्यांक लागून गंभीर मानवाधिकार मोडिल्ल्याचो आरोप केलो. तशेंच, हे भिरांकूय घडणुके खातीर जापसालदार आशिल्ल्यांचेर खर कारवाय करची आनी पिडेस्त कुटुंबियांक लुकसाण भरपाय मेळची, अशी मागणीय केली.
संस्थात्मक तपासणी सुरू
हे घडणुके प्रकरणांत पयलींच गुन्यांवकारी तपास, कांय वेवस्थापकांक अटक आनी सुरक्षा नेम मोडिल्ल्याची व्हड चवकशी सुरू आसा. आतां मानवाधिकार आयोगाचे नोटिसीक लागून हे घडणुकेचेर संस्थात्मक तपासणीचे वाडपी लक्ष केंद्रीत जालां. ६ जानेवारीक जावपी सुनावणेंत, हो उजो नेमको कसो लागलो, आपत्कालीन प्रतिसाद जाय तसो आशिल्लो काय आनी प्रशासकीय यंत्रणेच्या त्रुटींक लागून घडणुकेची व्याप्ती वाडल्या काय, हाचे वांगडा खुबश्या गंभीर मुद्द्यांचेर तपास करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
