भांगरभूंय | प्रतिनिधी
राजकोट, खबरां संस्था: गुजरातांतल्या राजकोट जिल्ह्यांतल्या अटकोट हांगा निर्भया प्रकरणा सारकीच घडणूक घडली. आरोपीन स वर्सां पिरायेच्या सानुल्याचेर बलात्कार करपाचो यत्न केलो. यत्न अपेशी जाले उपरांत ताणें चलयेच्या गुप्त भागांत रॉड घालो. चलयेक राजकोटच्या हॉस्पिटलांत दाखल केल्या.
पुलिसांनी आरोपीची वळख पटोवपाक सुमार १०० दुबावितांची चवकशी केली. उपरांत रामसिंग तेरसिंगची वळख पटली. ताका पुलिसांनी अटक केल्या. तो मध्य प्रदेशांतल्या अलीराजपूरांत रावपी.
बलात्काराचो यत्न
दाहोद जिल्ह्यांतलें एक मजूर कुटुंब अटकोट वाठारांत शेतांत मजुरी करतालें. ४ डिसेंबराक जेन्ना कुटूंब शेतांत काम करतालें, तेन्ना तांची स वर्सां आठ म्हयन्यांची चली थंय खेळटाली. एका अनवळखी मनशान ते चलयेक उखलून व्हेली आनी तिचेर अत्त्याचार केले. चलयेचें तोंड दामून तिचेर बलात्कार करपाचो यत्न केलो. जेन्ना चली आड्डली तेन्ना ताणें चलयेच्या गुप्तांगात रॉडा सारकिल्लें धारेचें शस्त्र घालें. घडणुके उपरांत आरोपी त्या रक्तान माखिल्ल्या सानुल्याक थंयच सांडून पळून गेलो.
जेन्ना कुटुंबीयांनी चलयेक सोदपाक सुरवात केली, तेन्ना ती लागींच दिसली. गंभीर अवस्था पळोवन कुटुंबीयांनी तिका राजकोटच्या हॉस्पिटलांत व्हेली. सध्या उपचार सुरू आसात.
१०० दुबावितांची चवकशी
राजकोट एसपी विजयसिंह गुर्जर हांणी सांगलें, पुलिसांनी पॉक्सो कायद्या खाला गुन्यांव दाखल केला. ताचे वांगडाच १० पंगड तयार करून आरोपींचो सोद सुरू केलो. सुमार १०० दुबावितांची चवकशी केली. उपरांत, १० आरोपींक चलये मुखार हाजीर केले. जंय चलयेन मुखेल आरोपी ३० वर्सां पिरायेचो रामसिंग तेरसिंग हाका वळखलें.
आरोपी गवंडें काम करता. ताका एक धूव आनी दोन पूत आसात. आरोपीक घडणुकेचे सुवाते लागसारच्या एका शेतांतल्यान पुलिसांनी धरलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
