भांगरभूंय | प्रतिनिधी
2.90 लाख फुकट्या प्रवाशांचेर कारवाय
मडगांव : कोंकण रेल्वे मार्गार तिकेटी बगर प्रवास करप्यांचेर कारवाय करून रेल्वे प्रशासनान 17.84 कोटींचो महसूल जमा केलो. जानेवारी ते नोव्हेंबर 2025 ह्या काळांत 7483 तिकेट तपासणी मोहिमो चालीक लावन तिकेटी बगर प्रवास करपी 2.90 लाख प्रवाशांचेर दंडात्मक कारवाय केली.
तिकेटी बगर प्रवास करप्यांचो आंकडो वाडिल्ल्यान कोंकण रेल्वेन तिकेट तपासणी मोहिमो खर केल्यात. तिकेटी बगर प्रवास करप्यां आड दंडात्मक कारवाय करतात. जानेवारी ते नोव्हेंबर 2025 ह्या काळांत कोंकण रेल्वे मार्गार 7483 विशेश तिकेट तपासणी मोहिमो चालीक लायल्यो. ह्या मोहिमांनी अनधिकृत तशेंच अनियमीत प्रवास केल्ल्याचीं 7483 प्रकरणां दिसून आयलीं. जाका लागून रेल्वे भाडें आनी दंड अशे मेळून 17.84 कोटी रुपया वसूल केल्यात.
नोव्हेंबरांत २.३३ कोटी दंड वसूल
कोंकण रेल्वे मार्गार कारवायेंत वाड जातनाच उत्सवाच्या दिसंनी दंडाची रक्कम वाडिल्ली दिसता. नोव्हेंबर 2025 ह्या एकाच म्हयन्यांत 1070 विशेश तपासणी मोहिमो राबयल्यात. जातूंत 42,965 अनधिकृत आनी अनियमीत प्रवासी दिसून आयले. भाडें आनी दंड अशे मेळून 2.33 कोटी रुपया वसूल केले.
वैध तिकीट काडून प्रवासाचें आवाहन
कोंकण रेल्वे प्रशासना कडल्यान सगल्या प्रवाशांक प्रवास सुरू करचे पयलीं वैध तिकेटी विकत घेवपाचे आवाहन केलां. योग्य तिकेटी बगर प्रवास करप हो दंडात्मक गुन्यांव आसा आनी कोंकण रेल्वेच्या पुराय मार्गार ह्यान फुडेंय तिकेट तपासणी मोहिमेचेर अदीक लक्ष केंद्रीत करतले, अशेंय स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
