भांगरभूंय | प्रतिनिधी
उत्तर गोंयच्यान 159 जाल्यार दक्षीण गोंयच्यान 168 उमेदवार रिंगणांत
पणजी: जिल्हो पंचायत वेंचणुकेचे अर्ज दाखल करपाची प्रक्रिया मंगळारा सोंपली. आतां मेरेन उत्तर आनी दक्षीण गोंयच्या 50 मतदारसंघांतल्यान वट्ट 327 उमेदवारांनी अर्ज दाखल केल्यात. उत्तर गोंयांतल्यान 159 जाल्यार दक्षीण गोंयांतल्यान 168 अर्ज दाखल जाल्यात.
हातूंत भाजपा उत्तरेंतल्यान 24 जाल्यार दक्षीणेंतल्यान 14 सुवातांचेर वट्ट 38 मतदारसंघांतल्यान वेंचणूक लडयतली. तशेंच मगो उत्तरेंतल्यान 1 आनी दक्षीणेंतल्यान 2 अशा तीन सुवातांचेर वेंचणूक लडयतलो.
तशेंच काँग्रेस उत्तरेंतल्यान 19 आनी दक्षीणेंतल्यान 16 मेळून 35 सुवातांचेर वेंचणूक लडयतली. जाल्यार गोवा फॉरवर्ड उत्तरेंतल्यान 5 आनी दक्षीणेंतल्यान 4 सुवातांचेर मेळून 9 सुवातांचेर वेंचणूक लडयतलो. आम आदमी पार्टी उत्तरेंतल्यान 21 आनी दक्षीणेंतल्यान 20 मेळून 41 सुवातांचेर वेंचणूक लडयतली.
जाल्यार रेव्होल्युशनरी गोवन्स पार्टीन (आरजीपी) उत्तरेंतल्यान 17 आनी दक्षीणेंतल्यान 11 मेळून 28 सुवातांचेर आपल्या उमेदवाराक वेंचणूक रिंगणांत देंवयल्यात. राष्ट्रवादी काँग्रेस (शरद पवार गट) 3 उमेदवार. तृणमूल काँग्रेसीचो एक उमेदवार दक्षीणेंतल्यान वेंचणूक लडयतलो. तशेंच स्वतंत्र उमेदवारां मदीं उत्तरेंतल्यान 28 आनी दक्षीणेंतल्यान 48 अश्या वट्ट 76 उमेदवारांनी आपलो अर्ज दाखल केला.
उत्तरेंतल्या धारगळ मतदारसंघांतल्यान 12 आनी दक्षीणेंतल्या पैंगीण मतदारसंघांतल्यान 11 सगल्यांत चड उमेदवारांनी अर्ज दाखल केल्यात. पाळे मतदारसंघांतल्यान भाजपा आनी काँग्रेसीची थेट लडत जातली.
1 डिसेंबर ते 9 डिसेंबर मेरेन अर्ज दाखल करपाची तारीख आशिल्ली. आयज 10 डिसेंबराक अर्जांची छाननी जावपाची आसा. फाल्यां 11 डिसेंबराक दनपारां दोन वरां मेरेन अर्ज फाटीं घेवपाची मुजत आसा. उपरांत उमेदवारांची निमाणी वळेरी जाहीर करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
