भांगरभूंय | प्रतिनिधी
पणजी : गोंयांत सेरेन्डिपिटी कला महोत्सव अंदूं १२ ते २१ डिसेंबर मजगतीं जातलो. महोत्सवाचें हें धावें वर्स. संगीत, नाच, नाटक, खाद्य संस्कृती, दृश्यकला, फोटोग्राफी आनी विवीध अणभवांनी भरिल्ल्या ह्या १० दिसांच्या उत्सवांत ३५ परस चड क्युरेटर्सांनी सादर केल्ले २५० परस चड प्रकल्प पळोवपाक मेळटले. कुटुंबां, विद्यार्थी, पर्यटक आनी कला जापप्यां खातीर हो सांस्कृतीक अणभव आसतलो.
धा वर्सांचो प्रवास
धाव्या वर्सांत प्रवेश करतना सेरेन्डिपिटीन देशविदेशांत आपलो प्रवास सुरू केला. बर्मिंघमांत काव्यवाचन आनी कार्यावळ, अहमदाबादांत इंडिया आर्ट फेअर वांगडा सहयोग, दिल्लीक सफदरजंग टॉम्ब मुखारची ‘शाम-ए-गझल’, वाराणसींत ब्रिजरामा पॅलेसींतल्या ‘रिव्हरराग’, चेन्नयंत ‘विशेश सांजेवेळार’, गुरुग्रामच्या ‘बी-साइड सेशन्स’ आनी दुबयच्या आधुनीक कला वातावरणान ह्या प्रवासांत नवचैतन्य भरलें.
संस्थापक सुनील कांत मुंजाल हांणी सांगलें, कला लोकांक जोडटा, करुणा वाडयता आनी समाजाक आनीक संवेदनशील करता. गोंयांत फाटल्या धा वर्सांनी शेकड्यांनी कलाकारांक संद दिल्या.
ह्या महोत्सवाचें खाशेलपण म्हणल्यार पणजी शाराक मेळपी नवी ऊर्जा. पोरणें जीएमसी कॉम्प्लेक्स, आर्ट पार्क, न्हंये देगेर फेस्टिव्हल बार्ज आनी नागाळी हिल्स एरिना ह्या सगल्या सुवातांचेर विवीध कार्यावळी जातल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
