भांगरभूंय | प्रतिनिधी
सन्मान मेळिल्ले ते सगल्यांत तरणाटे आनी पयले आशियाई
नवी दिल्ली: वन्यजीव संवर्धन आनी प्राणी कल्याणांतल्या उत्कृश्ट कार्या खातीर अमेरिकेंत जाल्ल्या आंतरराष्ट्रीय पुरस्कार सुवाळ्यांत नामनेचे उद्देगपती अनंत अंबानी हांकां ‘ग्लोबल ह्युमॅनिटेरियन अवॉर्ड’ दिवन भोवमानीत केले. ‘वनतारा’वरवीं जनावरां वाटोवप, उपचार, पुनर्वसन आनी तांचो सांबाळ हे हो सन्मान तांकां दिला. हे कामगिरी सयत, अनंत अंबानी हांणी एक विशेश विक्रमूय केला. हो सन्मान मेळपी ते सगल्यांत तरणाटे आनी पयले आशियाई थारल्यात. ह्यान पयलीं हो पुरस्कार अमेरिकी राष्ट्रपती जॉन एफ कॅनेडी आनी बिल क्लिटंन सयत हॉलीवुडचे दिग्गज आनी खुबश्या संवसारीक फुडाऱ्यांक दिल्लो.
ह्या सन्मानाक लागून वनताराचें काम परत एक फावट संवसाराचे नदरेंत आयलां. वनतारा संवसारांतलें सगल्यांत व्हड रान जीव संवर्धन प्रकल्पां मदलें एक. हांगा जखमी, दुयेंत आनी धोक्यांत आशिल्ल्या जनावरांक नवी जीण दिवपा खातीर तशेंच धोक्यांत आशिल्ल्या प्रजातींक वाटोवपा खातीर आनी तांकां सुरक्षीत वातावरणांत परत हाडपा खातीर सेगीत काम करतात.
हो पुरस्कार स्वीकारतना अनंत अंबानी हांणी म्हणलें, हो सन्मान म्हाका ‘सर्वभूत हित’ म्हळ्यार सगल्या सजीवांचें कल्याण करपाच्या मार्गार आनीक दृढतेने फुडें सरपाची प्रेरणा दिता. जनावरां आमकां जिणेंत संतुलन आनी संवेदनशीलता शिकयतात. वनतारा वरवीं आमचो हेत दरेका सजीवाक आदर, काळजी आनी बरें जिवीत दिवप आसा. आमचे खातीर संवर्धन ही फुडाराची गजाल न्हय, जाल्यार आयची जापसालदारकी आसा.
हे आंतरराष्ट्रीय कार्यावळींत रान जीव संरक्षणा कडेन जुळिल्ले मानेस्त हाजीर हाशिल्ले. हातूंत डॉ. जॉन पॉल रोड्रीगीस, मॅथ्यू जेम्स, विलियम स्ट्रीट, थॉमस श्मिड, डॉ. मायकल एड्केसन आनी कैथलीन डुडजिंस्की हांचो आसपाव आशिल्लो. भारतांतल्यान डॉ. नीलम खैरे, डॉ. वी. बी. प्रकाश आनी डॉ. के. के. शर्मा हे हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
