भांगरभूंय | प्रतिनिधी
आयज देशांत वाडट्या भ्रश्टाचाराक लागून सर्वसामान्यां मुखार व्हड आव्हान उबें रावलां. हाका लागून सगल्यांचीच जीण दिसानदीस पोखरत चल्ल्या. भ्रश्टाचारी देशाच्या 140 कोटी जनतेचें रगत कळत-नकळत पीत आसतात आनी आतांय पियेतना दिसतात. भ्रश्टाचारी भ्रश्टाचार करतात पूण हाचेर पड्डो उडोवपा खातीर नांवापुरती एखाद्या समितीची नेमणूक करून भ्रश्टाचाऱ्यांचेर पांगरूण घालतात. हाका लागून भ्रश्टाचाऱ्यांच्या केंसाकूय धक्को लागना आनी तांचे मनोबल आनीक वाडटा ही आयची सत्य परिस्थिती आसा. उपरांत ल्हवू ल्हवू भ्रश्टाचारी आपले आपूण मुक्त जाता आनी ह्या भ्रश्टाचाराक लागून भरडून वता तो सर्वसामान्य नागरीक, गरीब, शेतकार, दीसवड्यार काम करपी आनी बेरोजगार. ताका लागून प्रस्न निर्माण जाता की आतंकवादी देशाचे खर दुस्मान आसाच. तांचो खात्मो जावंकूच जाय हातूंत दुमत ना आनी तांकां मर मेरेन खर ख्यास्त जावंकूच जाय. तीच ख्यास्त भ्रश्टाचाऱ्यांक लेगीत जावंक जाय. कारण भ्रश्ट राजकी फुडारी गरिबांचे, शेतकारांचे रगत पिवून आडमार्गान पयसो जोडून करोडपती जातात. तांकां लेगीत आतंकवाद्या भशेन खर ख्यास्त जावंकूच जाय तेन्नाच भारत भ्रश्टाचार मुक्त जातलो, हेंवूय तितलेंच खरें आसा.
तेचप्रमाण खूबशे घोटाळो केल्ल्यांनी भ्रश्टाचार करून विदेशांत कोट्यांनी रुपया दवरल्यात तांचेर लेगीत सरकारान खर कारवाय करूंक जाय. भारत कृशीप्रधान देश आसा. पूण आमचो शेतकार संपत्तीन करोडपती आसून लेगीत अर्थीक नदरेन शुन्य आसा. आनी मूठभर कांय राजकी फुडारी आडमार्गान भ्रश्टाचाराच्या माध्यमांतल्यान कोट्यांनी रुपया जोडून शेतकार, गरीब आनी सर्वसामान्य अशे तरेन 140 कोटी लोकांचें कळत- नकळत रगत पियेतना दिसून येतात. देशांत वाडट्या भ्रश्टाचाराक लागून हजारांनी समस्या निर्माण जाल्यात, की ताची आमी मेजणी लेगीत करूंक शकनात. सद्याचे परिस्थितींत देशांत सगल्यांत चड दुख्खी आसा तो देशाचो अन्नदातो शेतकार. पूण शेतकारांचे जखमेचेर फूंक मारचे परस तांचे जखमेचेर मीठ चोळपाचें काम मूठभर कांय राजकी फुडारी भ्रश्टाचाराच्या माध्यमांतल्यान करतना दिसतात.
आयज देशांत सगल्यांत चड गिरेस्त आसात ते कांय मूठभर राजकी फुडारी. हांकां वत, पावस, शीं सुनामी, आडवेळो पावस, ओलो दुश्काळ हांचो कसलोच हुस्को नासता. कारण हे लोक चार वण्टी भितर बशिल्ले आसतात. हांचे चारूय वण्टीक बुलेटप्रूफ आवरण आसता. ताका लागून भ्रश्ट फुडाऱ्यांक शेतकार, गरीब, बेरोजगार आनी सर्वसामान्य लोकां कडेन कसलेंच देणेघेणें नासता. आतंकवादी खुनाची होळी खेळटात तेन्ना रगताचे कोंड दिसतात. पूण भ्रश्ट राजकी फुडारी आमजनतेक, शेतकारांक, गरिबांक स्लोपॉयझन दिवन पोखरीत आसतात आनी कळत नकळत तांकां मरण येता. हाका जापसालदार आयचो भ्रश्ट राजकी फुडारीच. आयचो मूठभर राजकी फुडारी कमी दिसांत करोडपती जाल्ल्याचें दिसून येता आनी हाकाच लागून देशांत म्हारगाय, शेतकारांच्यो आत्महत्या, बेरोजगारीची समस्या, भलायकीची समस्या, शिक्षणाची समस्या निर्माण जातना दिसतात. आयज राजकी फुडाऱ्यांचे भ्रश्ट नितीक लागून देश आनी देशाची जनता, शेतकार, सर्वसामान्य लोक 10 वर्सां फाटीं गेल्ल्याचें दिसून येता.
2014 सावन ईपीएस 95 पेंशनधारक जगपा इतली 7500 रुपया पेंशन आनी म्हारगाय भत्तो मेळचो हे खातीर संघर्श करीत आसा आनी केंद्र सरकारा कडेन मागणी करीत आसात. पूण सरकार हे विशींचो कसलोच विचार करिनाशिल्ल्याचें दिसून येता. हे खातीर सरकार फक्त ‘तारीख पे तारीख’ अशी भुमिका घेतना दिसता. देशाक जर सुजलाम सुफलाम करपाचें आसत जाल्यार सगल्यांत पयलीं भ्रश्ट राजकी फुडाऱ्यांचेर आळो घालपाक जाय. फक्त आळो घालून चलचें ना जाल्यार आतंकवाद्यांक जे तरेन खर ख्यास्त दितात तेचप्रमाण भ्रश्ट राजकी फुडाऱ्यांक खर ख्यास्त जावंक जाय. तेन्नाच देशाचो चेरो बदलिल्ल्याचें दिसून येतलें हातूंत मात लेगीत दुबाव ना.
आयज देशांत तस्करी, अवैध धंदे जातना आमी पळयतात. ताचे फाटल्यान कांय राजकी फुडाऱ्यांचो अवश्य हात दिसून येता आनी हातूंतल्यानूच भ्रश्टाचार उदयाक येता. आयज आमी पळयतात की देशांत खुबश्या राज्यांनी अती दुर्गम वाठारांतलो विकास नगन्य आसा. ताका लागून आयजूय दुर्गम वाठारातं कुपोशणाक लागून मरणाचें प्रमाण वाडिल्ल्याचें दिसून येता. देशांतल्या राजकी फुडाऱ्यांनी अती दुर्गम वाठारां कडेन जातीन लक्ष केंद्रीत केल्लें जाल्यार आयज अती दुर्गम वाठार लेगीत सुजलाम सुफलाम दिसून येतलो आशिल्लो.
देशांतल्या राज्य सरकारांनी आनी केंद्र सरकारान राजकी फुडाऱ्यांचे संपत्ती विशीं एक शीम आंखप आयचे परिस्थितीक सामकी गरजेची जाल्या. राजकी फुडाऱ्यां कडेन चडांत चड कितली चल- अचल संपत्ती आसची हाचेर केंद्र सरकारान आनी राज्य सरकारांनी गायड लायन निश्चीत करप गरजेची आसा. तेन्नाच भ्रश्टाचाऱ्यांचेर नियंत्रण दवरूंक येतलें. देशांतलो कोणूय भ्रश्टाचारी आसूं ताका खर ख्यास्त जावंकूच जाय. आमी पळयतात राजकी फुडारी जेन्ना वेंचणुको येतात तेन्ना व्हड अभिमानान सांगतात की, हांव शेतकाराचो पूत, हांव कंडक्टर आशिल्लों. हांव ऑटो चलयतालों. खाजगी नोकरी करतालों. दीसवड्यार काम करून कुटुंब चलयतालों. अशे तरेचीं खुबशीं उदाहरणां राजकी फुडारी वेंचून आयले उपरांत दितात. ताका लागून प्रस्न निर्माण जाता की वेंचून आयले उपरांत अवघ्या पांच वर्सांत लोकप्रतिनिधी, जनप्रतिनिधी कशे कितें करोडपती जातात हीच अजापाची गजाल आसा न्हय? हाचेर राज्य सरकारांनी आनी केंद्र सरकारान लक्ष केंद्रीत करपाची सामकी गरज आसा. तेचप्रमाण महामहीम राष्ट्रपती, प्रधानमंत्री हांकां विनंती करतां की भ्रश्टाचाराचेर आळो घालपा खातीर आपले पद्दतीन सगले ते यत्न करूंक जाय. तेन्नाचा भ्रश्टाचाराचेर नियंत्रण दवरूंक मेळटलें आनी आळो बसतलो. जय हिंद.
रमेश कृष्णराव लांजेवार
9921690779
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
