झारखंडी गोंदळ

भांगरभूंय | प्रतिनिधी

हडफडेंच्या नायट क्लबांत 25 जाणांक मरण येवपाची घडणूक ताजी आसतनाच काल पिलारच्यान खबर आयली. संगीत कार्यावळ जावंक नाशिल्ल्यान झारखंड, बिहारांतल्या (काय आनीक खंयच्या?) तिडकल्ल्या तरणाट्यांनी फादर आग्नेल म्हाविद्यालया लागसारच्या मैदानाचेर धुडगूस घालो. म्युझीक सिस्टम, माची, कदेलांची मोडतोड केली. उजो लावपाचो यत्न केलो. लाखांनी रुपयांचें लुकसाण जालें. इतलेंच न्हय, थंयचे शाळेचेर गुंडेय मारले. आयतार आशिल्ल्यान विद्यार्थी नाशिल्ले. ह्या तरणाट्यांक धांवडावपाक पुलिसांक दांडे वापरचे पडले. थोड्यांक ताब्यांतूय घेतले. भितर कांय जाण नशेंत आशिल्ले खंय. सादारण पांच हजारां वयर तरणाटे जमिल्ले. हे कार्यावळीं विशीं काल सांज मेरेन कोणाक सारकी म्हायती नाशिल्ली. सगल्यो ऐकीव गजाली. ‘झारखंड दीस’ काल सोमारा जालो. ताचे आदले दीस कांय जाणांनी संगिताची कार्यावळ दवरिल्ली. तिकेट 300 ते 350 रुपया. घडये देणगी कुपनांय आसात, कारण कार्यावळ मैदानाचेर आशिल्ली. ती वेळार सुरू जावंक ना. आयोजकूय तिकेटीचे पयशे घेवन गायब जाले. पासिंयेंस काबार जाल्ल्यान तरणाटे तिडकले. तातूंतल्या कांय जाणांनी हाताक मेळटा तें घेवन मुखार दिसता तें फोडपाक सुरवात केली. 10 लाखांची म्युझीक सिस्टम फोडली, कदेलां शेंवटिलीं.एकलो रक्तबंबाळ जावन बेशुद्ध पडलो. व्हिडियोंत हें दिसता. तांणी फक्त आयोजकांचेरूच तिडक काडली. जर गांवकारांक, व्हिडियो काडपी पत्रकारांक हाचो फटको बशिल्लो जाल्यार कितें जावपाचें ताची फक्त कल्पना करची. दोनूय वटेन पेटपाचें. पुलिसांनी धांव मारून फुर्योज जाल्ल्या ह्या तरणाट्यांक धरले.
ही सांस्कृतीक कार्यावळ अशें थोडे म्हणटात. पूण असले कार्यावळीक पियेवन कोण वतात? आयोजक कोण, खंयचे? थंय गावपाक, नाच करपाक कोण आयिल्ले? बिहारांत असले आॅर्केट्रा खूब जातात. तातूंत चलयो बी नाचतात. ही तसलीच कार्यावळ काय भक्तीगितांची बी? प्रेक्षकांत कोण बायलो, चलयो दिसूंक नात. आयोजक तिकेटीचे पयशे घेवन पळपा फाटलें कारण कितें? गायक येवंक नात काय आनीक कितें समस्या निर्माण जाली? हे सगले तरणाटे गोंयांत स्थायीक जाल्ले काय खास बिहार, झारखंडांतल्यान आयिल्ले? नाताल, नव्या वर्सा निमतान पर्यटन थळ आशिल्ल्या गोंयांत ही कार्यावळ खास आयोजीत केल्ली?? ह्या सगल्या प्रस्नांच्यो जापो पुलिसांक सोदच्यो पडटल्यो. हें मैदान भाड्यान दिवप्याक घडये हें सगलें खबर आसतलें. कार्यावळ जावंक ना म्हूण तरणाटे तिडकले अशें म्हणटात, पूण तिडकी फाटल्यान आनिकूय कितें कारण आसपाक शकता.
गोंयांत भायल्यो कंपनीं येवन इव्हेंट करतात, तसो कोणें पिलार दवरिल्लो बी? 5 – 10 हजार प्रेक्षक जमतलो जाल्यार आयोजकांनी परवानगी घेवंक जाय. उजो पालोवपी दळ, भलायकी खातें, पंचायत, पुलीस हांची परवानगी घेवप कायद्यान बंधनकारक. कोणेय उठचें, गोंयांत येवचें आनी जागो मेळटा थंय कार्यावळ आयोजीत करची, अशें बी घडलां? गोंयांत झारखंडी नागरिकांची समिती, संघटणा आसल्यार तांकां हे विशीं खबर आसूं येता. आयोजकांची कितें अडचण जाल्ली जाल्यार तांणी माफी मागून लोकांचे तिकेटीचे पयशे परत दिवपाचे! ही कार्यावळ जातली म्हूण चडश्या कोणाक खबर नाशिल्लें. दिसाळीं, सोशल मिडियाचेरूय ती खबर ठळकपणान दिसूंक ना. भायल्यांनी गोंयांत येवन भायल्यां खातीर ही कार्यावळ दवरिल्ली, काय गोंयांतल्या झारखंडी तरणाट्यांनी ती आयोजीत केल्ली? कार्यावळ जर बेकायदेशीर आशिल्ली जाल्यार सरकारी यंत्रणांक कडक कारवाय करची पडटली. पुलिसांनी बेगीन तपास करचो.
फक्त पयशे एकठांय करप होच जर हे कार्यावळी फाटलो उद्देश आसा, जाल्यार हो गुन्यांव जालो. आयोजकांक ताब्यांत घेतले बगर कितें तें स्पश्ट जावचें ना. गोंय खंयचे दिशेन चल्लां ताची हिवूय एक झलक म्हणपाची.