भांगरभूंय | प्रतिनिधी
गोवा फॉरवर्डा कडेन मात युती जातली : माणिकराव ठाकरे
भांगरभूंय । प्रतिनिधी
पणजी : जाग्यां विशीं एकमत जावंक नासले कारणान जिल्हो पंचायत वेंचणूके खातीर आतां काँग्रेस – आरजी मदीं युती जावची ना. युती जावप आतां अशक्य आसा, अशें गोंय काँग्रेसीचे प्रभारी माणिकराव ठाकरे हांणी सांगलें. गोवा फॉरवर्डा कडेन मात युती जातली आनी चर्चा सुरू आसा, अशें तांणी सांगलें.
जिल्हो पंचायत वेंचणूक 20 डिसेंबराक जातली. आचारसंहिता जारी जावन उमेदवारी अर्ज भरपाक सुरवात जाले उपरांत लेगीत काँग्रेस आनी आरजी मदीं युतीची चर्चा सुरू आशिल्ली. शेनवारा ठाकरे हांचे हाजेरीत काँग्रेस, गोवा फॉरवर्ड आनी आरजी हांचे फुडाऱ्यांची युतीचेर चर्चा जाली. हे चर्चे उपरांत काँग्रेसीन जो आरजीक प्रस्ताव दिल्लो तो आरजीन अमान्य केला. सुदारीत प्रस्ताव आरजीन अमान्य केल्ल्यान काँग्रेसीची आता आरजीकडेन युती जावची ना, अशी म्हायती काँग्रेसीचे उपाध्यक्ष एम. के. शेख हांणी लेगीत दिली.
सांताक्रूझा काँग्रेसीचो झेडपी वांगडी आसा. तो जागो सोडपाक आरजीची तयारी ना. काँग्रेस घटमुट आशिल्या जाग्यांचेर लेगीत तांणी दावो केलो. हाका लागून युती जावंक शकली ना, अशें ठाकरे हांणी सांगलें. दीस लागी पाविल्यान आनीक चर्चा जावची ना. काँग्रेसीच्या प्रस्तावाचेर आमी थेट निर्णय कळयतले, अशें आरजीचे मुखेली मनोज परब हांणी स्पश्ट केल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
