भांगरभूंय | प्रतिनिधी
मडगांव : दक्षीण गोंय पुलिसांनी वाडट्यो चोरयो, दरोड्यांचे फाटभुंयेर नाकाबंदी आनी रातीची गस्त वाडयल्या. शेनवारा रातीं कोलवा, बाणावली, वास्को, मडगांव, नावेली ह्या वाठारांनी अचकीत नाकाबंदी करून गाडयांची आनी व्यक्तींची चवकशी केली.
दक्षीम गोंय जिल्हो पुलिसांनी गुन्यांवकारीचेर आळाबंद हाडपा सयत रातच्या वेळार जावपी चोरयो, दरोड्या सारकीं प्रकरणां जावची न्हय हे खातीर रातची अचकीत गस्त घालपाक सुरवात केल्या. रस्त्या वयले गस्तींत वाड करपाची सुचोवणी हालींच मुख्यमंत्र्यान केल्ली. शेनवारा मडगांवचे उपविभागीय अधिकारी सिद्धांत शिरोडकार हांचे सयत पुलीस निरिक्षक आनी हेर सांगात्यांनी साश्टींतल्या विवीध वाठारांनी नाकाबंदी करून गाडयांची तपासणी केली. दक्षीण गोंयांतल्या बायणा वाठारांतले दरोड्याचे घडणुके उपरांत पुलिसांनी रातीची गस्त वाडयल्या. वास्को झुआरीनगर बाजारपेठ, लागसारच्या झोपडपट्टी वाठारंत आनी मडगांवां पुलिसांनी भौशीक सुरक्षा सुनिश्चीत करचे खातीर चलत गस्त घातली. कोलवा पुलीस स्टेशनाचे हद्दींत नाकाबंदी केली. तातूंत कोलवा पुलीस कर्मचाऱ्यांनी वाठारांतली सुरक्षा राखपा खातीर गाडयांची तपासणी आनी नेम मोडप्यांचेर कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
