हडफडेंच्या ’बर्च बाय रोमिओ लेन’ क्लबाक उजो: २५ जाणांक मरण

भांगरभूंय | प्रतिनिधी

पणजी: हडफडेंच्या ’बर्च बाय रोमिओ लेन’ ह्या नामनेच्या क्लबाक आयतार, ७ डिसेंबराक मध्यानरातीर सुमार १ वरांचेर उजो लागलो. हे घडणुकेंत आतां मेरेन २५ जाणांक मरण आयलां. हातूंत २३ जाणांक घुस्मटून, जाल्यार दोगांक लासून मरण आयलें. मरण आयिल्ल्यां मदीं ३ बायलांचो आनी चार पर्यटकांचो आसपाव आसा. मुळावे म्हायती प्रमाण, क्लबाच्या किचनान जाल्ल्या गॅस सिलिंडराच्या स्फोटाक लागून हो उजो लागिल्ल्याचो अदमास आसा.
हे घडणुकेची म्हायती मेळटांच मुख्यमंत्री डॉ. प्रमोद सावंत, थळावे आमदार मायकल लोबो आनी पुलीस महासंचालक आलोक कुमार घडणुके सुवातेर पावले. तांणी परिस्थितीचो आढावो घेतलो.
मुख्यमंत्र्यांनी हे घडणुके विशीं दुख्ख उक्तायत ’गोंयकारां खातीर हो सामको दुख्खाचो दीस’ आशिल्ल्याचें नमूद करीत म्हणलें, हडफडच्या बिर्च क्लबाक उजो लागून जाल्ले घडणुकेची चवकशी जातली. दोशींचेर खर कारवाय जातली. हडफडचे घडणुकेची दंडाधिकार्‍यां वरवीं चवकशी करपाचे आदेश दिल्यात. जखमी जाल्ल्या ६ जाणांची भलायकी स्थीर आसा. तांचेर बरे वैजकी उपचार चल्ल्यात अशी म्हायती दिली.
तशेंच हे घडणुकेक कारण थारिल्ल्या कोणाकूच सोडचे नात अशें मुख्यमंत्र्यांनी स्पश्ट केलें. प्रधानमंत्री नरेंद्र मोदी हांणी प्रत्यक्ष उलोवन उज्याचे घडणुकेची म्हायती घेतली. मरण आयिल्ल्यांच्या कुटुंबियांक गरजेची आशिल्ली सगले तरेची मजत गोंय सरकार करतलें अशें मुख्यमंत्र्यान सांगलें.
प्रधानमंत्री नरेंद्र मोदी हांणी हे घडणुके विशीं दुख्ख उक्तायतना म्हणलें, मरण आयिल्ल्यांच्या कुटुंबियांक प्रधानमंत्री राष्ट्रीय मजत निधींतल्यान २ लाख रुपया आनी जखमींक ५० हजार रुपयांची मदत जाहीर केली.
हडफडच्या बिर्च बाय रोमिओ लेन क्लबाक रातीं उजो लागल्लें कळटांच मुख्यमंत्री डॉ. प्रमोद सावंत हांणी घडणुके सुवातेक भेट दिवन मजत कार्याची पळोवणी करून गरजेचे आदेश अधिकार्‍यांक दिले. सिलिंडराच्या स्फोटाक लागून उजो लागिल्ल्याचो अदमास आसा. क्लबांत उजो पालोवपी यंत्रणां तशेंच सुरक्षा विशींचे परवाने आनी वेवस्था आशिल्ली काय, हाचीय चवकशी जातली.
उज्याची म्हायती मेळटांच उजो पालोवपी आनी आपत्कालीन सेवा दळ तशेंच पुलीस पंगड रोखडेच घडणुके सुवातेर दाखल जाले आनी तांणी झुजां पावड्यार रेस्न्यू ऑपरेशन सुरू केलें. उजो लागिल्ल्यान क्लबाचें व्हड लुकसाण जालें. बचाव पंगडान भितर आडकल्ल्या लोकांक भायर काडपाचो आनी उज्याचेर नियंत्रण मेळोवपाचे बरेच यत्न केले.
हे घडणुकेंत जखमीं जाल्ल्या ६ जाणांक गोमेकॉंत उपचारा खातीर दाखल केल्यात. हातुंतल्या एकल्या डिस्चार्ज दिला. उरिल्ल्या ५ जखमींची भलायकी सध्या बरी आसा आनी तांचेर बरे वैजकी उपचार सुरू आसात, अशी म्हायती मुख्यमंत्र्यांनी दिली.

घडणुकेंत मरण आयिल्ल्यांच्यो कुडी पोस्टमार्टमा खातीर गोमेकॉंत धाडल्यात.
हडफडेंचे सरपंच रोशन रेडकार हांणी क्लबाचें बांदकाम बेकायदो आशिल्ल्याचो आरोप करीत, पंचायतीन हें बांदकाम मोडपाचे आदेश दिवनूय धनयांनी न्यायालयाकडल्यान स्थगिती मेळयिल्ली. सरकारान आतां हे विशीं खर कारवाय करपाची मागणी तांणी केली.
मजगतीं, प्रदेश कॉंग्रेस अध्यक्ष अमित पाटकार हांणी ही दुखेस्त घडणूक आशिल्ल्यान हो गोंय पर्यटन इतिहासांतलो काळो दीस आशिल्ल्याचें म्हणलें. तशेंच भाजप सरकाराच्या काळांत भौशीक सुरक्षा आनी प्रशासन हालिल्ल्याचो हो परिणाम आशिल्ल्याचें तांणी म्हणलें.
पुलीस महासंचालक आलोक कुमार हांणीय, क्लबाची संरचना, अग्निसुरक्षा नेम पाळप आनी आनी आपत्कालीन वेळार भायर पडपाच्या मार्गांची तपासणी करपाचे निर्देश दिले. पुलिसांनी क्लब सील करून फुडलो तपास सुरू केला. हे घडणुके उपरांत हेर नायटलायफ आस्थापनांचीय अग्निसुरक्षा तपासणी करपाची प्रक्रिया सुरू करतले. गोंयच्या पर्यटन इतिहासांतलो काळो दीस म्हणून आयचो दीस गोंयचे जनतेच्या कायमच लक्षांत उरतलो.

राष्टीय फुडार्‍यांनी उक्तायलें दुख्ख
मजगतीं, हडफडच्या क्लबाक उजो लागून २५ जाणांक मरण आयिल्ल्याचे घडणुकेचें कॉंग्रेसीचे फुडारी राहुल गांधी, राष्ट्रीय अध्यक्ष मल्लिकार्जुन खर्गे, प्रियांका वेड्रा, गोयंचे प्रभारी माणिकराव ठाकरे तशेंच आपचे राष्ट्रीय संयोजक अरविंद केजरीवाल हांणी दुख्ख उक्तायलां. ह्या सगल्यांनी खोलायेन चवकशी करपाची मागणी केल्या.