वन डे माळ भारताच्या बॉल्सांत

भांगरभूंय | प्रतिनिधी

यशस्वी जयस्वालाचो शेंकडो आनी कुलदीप यादवाची उत्कृश्ट बॉलींग हाच्या नेटार भारतान तिसरे मॅचींत दक्षीण आफ्रिका पंगडाक 9 विकेटींनी हारोवन तीन मॅचींची वन डे माळ 2-1 अशा फरकान जिखली.
दक्षीण आफ्रिका पंगडान पयलीं बॅटींग करतना 47.5 ओव्हरींनी 270 धांवड्यो केल्यो. भारतान 271 धांवड्यांची मोख 39.5 ओव्हरींनी फक्त एक विकेट व्हगडावन मेळयली.
जयस्वाला खेरीत रोहित शर्मान 75 आनी विराट कोहलीन नाबाद 65 धांवड्यांची खेळी केली, जाल्यार कुलदीप यादव आनी प्रसिद्ध कृष्णा हांणी 4-4 विकेटी घेतल्यो.
वन डे क्रिकेटींत सेगीत 20 टॉस हारल्या उपरांत अखेरेक भारतान काल टॉस जिखलो आनी मुखेली लोकेश राहुलान दक्षीण आफ्रिका पंगडाक पयलीं बॅटींग करपाचें आमंत्रण दिलें.
दक्षीण आफ्रिकेची सुरवात बरी जाली ना. पयलेच ओव्हरींत रायन रिकल्टन शुन्याचेर बाद जालो. ताका अर्शदीप सिंगान बाद केलो. हांगाच्यान क्विंटन डी कॉक आनी मुखेली टेम्बा बवुमा हांणी दुसरे विकेटी खातीर 113 धांवड्यांची भागिदारी करून पंगडाचो स्कोर 100च्या वयर पावयलो.
बवुमान 67 बॉलांनी 48 धांवड्यांची खेळी केली. अखेरेक तो 21वे ओव्हरींत बाद जालो. ते उपरांत डी कॉकान ब्रीत्जके (24) वांगडा तिसरे विकेटी खातीर 54 धांवड्यांची भागिदारी केली. हे मजगतीं, डी कॉकान आपलो 23वो वन डे शेंकडो लेगीत पूर्ण केलो.
29वे ओव्हरींत प्रसिद्ध कृष्णान ब्रित्जके आनी मार्करम हांकां बाद करून दक्षीण आफ्रिकेचो डाव गडगडायलो.
33वे ओव्हरींत 199चे धांवसंख्येचेर डी कॉक लेगीत 89 बॉलांनी 106 धांवड्यो करून बाद जालो. ते उपरांत कुलदीप यादवान फक्त 41 धांवड्यांनी 4 विकेटी घेवन दक्षीण आफ्रिका पंगडाक व्हड धांवसंख्या उबारपा पसून आडायलो. डेवाल्ड ब्रेविस (29) आनी केशव महाराज (20) हांकां लागून दक्षीण आफ्रिका पंगडाक 270 मेरेन कसोबसो पावप शक्य जालें.
मोखीचो फाटलाव करपी भारताची सुरवात एकदम जबरदस्त जाली. पयले विकेटी खातीर रोहित आनी जयस्वालान 155 धांवड्यांची भागिदारी केली. रोहितान 73 बॉलांनी 75 धांवड्यांची खेळी केली. हे मजगतीं, ताणें आंतरराष्ट्रीय क्रिकेटींत आपल्यो 20 हजार धांवड्यो लेगीत पूर्ण केल्यो. 26वे ओव्हरींत 155च्या स्कोराचेर केशव महाराजान रोहिताक बाद केलो. हांगाच्यान जयस्वालान कोहली वांगडा दुसरे विकेटी खातीर नाबाद 116 धांवड्यांची भागिदारी केली आनी 61 बॉल बाकी दवरून जैत मेळोवन दिलें.
जयस्वालान हे मजगतीं, आपलो पयलो वन डे शेंकडो पूर्ण केलो. भारता वतीन तिनूय फॉर्मेटांत शेंकडो मारपी तो फक्त सवो बॅट्समन थारलो.
ताणें 121 बॉलांनी नाबाद 116 धांवड्यांची खेळी केली. ताणें 12 चवके आनी दोन सके मारले. विराट कोहलीन 45 बॉलांनी 65 धांवड्यांची ताबडतोड बॅटींग केली.