युती विशीं सकारात्मक चर्चा

भांगरभूंय | प्रतिनिधी

आयज निमाणो निर्णय जातलो अशें ठाकरे हांचें म्हणणें

आयज सोंपतलो झॅडपी वेंचणुकेचे आघाडीचो सपेन्स

काँग्रेस हायकमांडाचो आरजीपीक नवो प्रस्ताव

भांगरभूंय । प्रतिनिधी

पणजी : जिल्हो पंचायत (झॅडपी) वेंचणुके खातीर विरोधकांचे आघाडीचेर ‘सपेन्स’ अजून चालू आसा. युती जाता… जायना ह्या गजाली मजगती युती विशींचो निमाणो निर्णय आयज जावपाची शक्यता आसा. काँग्रेसीच्या हायकंमाडान नवो प्रस्ताव दिला आनी ह्या प्रस्तावाचेर विचार करून निमाणो निर्णय घेतले, अशें आरजीपीचे मुखेली मनोज परब हांणी सांगलें. जाल्यार युती विशीं सकारात्मक चर्चा जाल्या आनी युती विशीं निमाणो निर्णय आयज जातलो, अशें काँग्रेसीचे गोंय प्रभारी माणीकराव ठाकरे हांणी सांगलें.

गोंय काँग्रेसीचे प्रभारी माणीकराव ठाकरे हांणी आघाडीचे घटक रेव्ह्युलेशनरी गोवन्स पार्टी आनी गोवा फॉरर्वडाचे फुडाऱ्यांवांगडा चर्चा केली. ह्या वेळार काँग्रेसीचे गोंय प्रदेशाध्यक्ष अमीत पाटकार, काँग्रेसीचे वरिश्ठ फुडारी एम. के. शेख, आरजीपीचे अध्यक्ष मनोज परब, आरजीपीचे आमदार विरेश बोरकार, गोवा फॉरर्वडचे अध्यक्ष विजय सरदेसाय हजर आसले. पूण ह्या तिनूय पक्षांची एकठांय येवन बसका जावंक ना.

पयलीं गोवा फॉरवर्डाचे अध्यक्ष विजय सरदेसाय हांचे वांगडा चर्चा जाली. सरदेसाय गेले उपरांत आरजीपीची आनी काँग्रेसीची एकामेका फुड्यान चर्चा जाली. सरदेसाय वांगडा चर्चा सुमार अर्द वर आसली. जाल्यार आरजीपी वांगडा बसका ही देड वर सुमार चल्ली.

बसके उपरांत उलयतना मनोज परब हांणी सांगलें, आरजीपीन सुरवात ते आतां मेरेन खंयचे मतदारसंघ, खंयचे म्हाल सोडले. तशेंच आघाडी घटकांनी भाजपांत गेल्ले फुटीर आमदारांक परत घेवपा विशींची घडणूक तशेंच युती आसतना पयलींच उमेदवार जाहीर करपाचे प्रकार आमी तांचे मुखार मांडून चर्चा केली.

काँग्रेसीचे वरिश्ठ फुडारी एम. के. शेख हांणी आमकां विनवणी करून आमकां परत एक फावट आरजीपीचे समिती वांगडा बसून चर्चा करपाक सांगल्या. काँग्रेसीच्या वरिश्ठ फुडाऱ्यांनी आमकां नवो प्रस्ताव दिला आनी तो सध्या उक्तो करपाक शकनात. आमी हो प्रस्ताव समितीच्या वांगड्या मुखार मांडटले आनी तांची मान्यताय मेळ्ळी जाल्यार आमी आयज परत बसकेक हजर आसतले. जर मान्यताय मेळना जाल्यार हाचे फुडें कसलीच बसका जावची ना, अशें आमी स्पश्ट सांगलां, अशी म्हायती परब हांणी दिली.

हो प्रस्ताव फुडे व्हरपाचो काय ना तो पक्षाच्या वांगड्यांचेर निंबून आसा. जर आघाडी जाता वा जर आघाडी जायना हे विशींची कारणां आनी स्पश्टीकरणा सयत आमी पत्रकार परिशदेंत जाहीर करतले, अशें परब हांणी म्हणलें.

बसकेंत किते चर्चा जाली आनी कशे भशेन ही आघाडी फुडे वता हें आयज कळटलें, अशें काँग्रेसीचे गोंय प्रभारी माणीकराव ठाकरे हांणी सांगलें.

युती विशीं सकारात्मक चर्चा जाल्या आनी आयज हे चर्चेच्या मुद्याचेर शिक्को बसतलो आनी निमाणो निर्णय किते तो आयज घोशीत जातलो. आरजीपीन पयली कितें उलयल्ले आनी आतां कितें उलयल्यात हें सगलें सोडून दियात. युती विशीं दोनूय पक्षांनी सकारात्मक भुमिका घेतल्या. आयज मेरेन सगळे स्पश्ट जातलें. फक्त रावात आनी वाट पळयात, अशें ठाकरे हांणी म्हणलें.

मजगतीं, गोवा फॉरर्वडचे अध्यक्ष विजय सरदेसाय हांणी सांगलें, आमची युती काँग्रेसी वांगडार पयलीं आसली आनी हाचे फुडें आसतली.

गोवा फॉरवर्डान आपले मतदारसंघ काँग्रेसीक सांगल्यात आनी त्या मतदारसंघांनी काम चालू आसा. काँग्रेस आमचो वरिश्ठ घटक. सुवातो वांटपा विशीं कितें तो निर्णय आसा तो काँग्रेस घेतले. आमी दबाव तंत्र वापरचें नात. आरजीपी विशीं, युती विशीं आमच्या तीन पक्षांची एकठांय येवन बसका जावंक ना. काँग्रेस आनी आरजीपी वेगळे बसून उलयताले, अशें विजय सरदेसाय हांणी म्हणलें.