भांगरभूंय | प्रतिनिधी
मडगांवः आके वाठारांतल्या फास्ट फूड सेंटराक शुक्रारा रातीं तीन वरांचे सुमाराक उजो लागलो. मडगांव उजो पालोवपी दळान उजो नियंत्रणांत हाडलो. हातूंत सुमार 25 लाखांचें लुकसाण जालें. जाल्यार 4 लाखांची मालमत्ता वाटोवपाक येस आयलें. उज्याचें कारण अजून कळूंक ना.
आके पॉवर हावसाच्या यशोधन हॉस्पिटल लागसारच्या अल्झाना कॉम्प्लेक्सांतल्या सकयल्या माळये वयल्या फास्ट फूड सेंटराक सकाळीं सुमार 3 वरांचेर उजो लागलो. ह्या सेंटरांतली सगळीं उपकरणां आनी वायरींग लासून गोबर जाली. फास्ट फूड सेंटराचो धनी रघुवेंद्र पै हांणी दिल्ले म्हायती प्रमाण, रातीं 3 वरांचे सुमाराक कांय शेजाऱ्यांनी ताका फोन करून दुकानांतल्यान धुंवर येता अशें सांगलें. आनी रोखडीच मडगांव उजो पालोवपी दळाक हे विशीं म्हायती दिली. उजो पालोवपी दळाचे कर्मचारी थंय पावता म्हणसर उजो पातळ्ळो. उजो लागपाचें कारण अजून कळूंक ना.
ह्या उज्यांत अन्न तयार करपाचीं सगळीं उपकरणां, धान्य सांठोवपाचीं उपकरणां, वायरींग आनी हेर सामान लासून गोबर जालें. मडगांव उजो पालोवपी दळान दिल्ले म्हायती प्रमाण ह्या उज्यांत फास्ट फूड सेंटराची सुमार 25 लाखांची मालमत्ता जळ्ळी, जाल्यार 4 लाखांची मालमत्ता वाटायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
