भांगरभूंय | प्रतिनिधी
पणजीः गोंयांत जानेवारी ते ऑक्टोबर 2025 ह्या काळांत 237 जाणांक एचआयव्हीची लागण जाल्या. हातूंत 9 गुरवार बायलां सोडल्यार 228 मदीं 173 दादले, 54 बायलो आनी एक ट्रांसजेंडर हांचो आस्पाव आसा. बायलांच्या पिरायेच्या गटा प्रमाण 35 ते 49 वर्सां पिरायेच्या गटांतल्या लागण जाल्ल्या लोकांचो आंकडो हेर खंयच्याय पिरायेच्या गटापरस चड आसा. हाचे उपरांत 25 ते 34 वर्सां पिरायेच्या गटांतल्या संसर्ग जाल्ल्या बायलांचो आंकडो चड आसा. ही म्हायती राज्य एड्स नियंत्रण संस्थेन जाहीर केल्ल्या अहवालांतल्यान मेळ्ळ्यां.
अहवाला प्रमाण, वयल्या धा म्हयन्यांत वट्ट 54 लागण जाल्ल्या मदीं 25 (46.3%) बायलो 35 ते 49 पिराये गटातल्यो आसात. 25 ते 34 पिराये गटातल्यो 16 (29.6%), 50 परस चड पिराये गटातल्यो 11 (20.4%) जाल्यार 15 ते 24 आनी 14 वर्सा सकयल्या दरेकी एक बायलेक लागण जाल्या. दादल्या मदीं 173 मदल्या सगळ्यांत चड 67 लागण जाल्ल्या मदीं (38.7%) 25 ते 34 पिराये गटातले आसात. उपरांत 35 ते 49 पिराये गटातले 54 (31.2%), 50 परस वयर पिराये गटातले 31 (17.9%) जाल्यार 15 ते 24 पिराये गटातल्या 27 (11%) जाणांक लागण जाल्या.
दादल्यां मदीं एक संसर्ग जाल्लो मनीस 14 वर्सां सकयलो मेळ्ळा. फाटल्या कांय वर्सांत 35 ते 49 वर्सां पिरायेच्या गटांतल्या संसर्ग जाल्ल्या बायलांचो आंकडो उणो जाला. 2020 वर्सा वट्ट संसर्ग जाल्ल्या बायलां मदली 56% बायलो ह्या पिरायेच्या गटांत आशिल्ल्यो. 2021 वर्सा 52%, 2022 वर्सा 37%, 2023 वर्सा 38% आनी 2024 वर्सा 33% संसर्ग जाल्ल्यो बायलो ह्या पिरायेच्या गटांत आशिल्ल्यो. वयल्या काळांत दोन बायलांक एड्साची लागण जाल्ली. सप्टेंबराच्या निमाणे मेरेन राज्यांत 20 दुयेंतींक एड्साक लागून मरण आयलें. तातूंतले पांच दुयेंती बायलो आशिल्ल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
