भांगरभूंय | प्रतिनिधी
पणजीः काणकोणच्या चापोली धरण वाठारांत जाल्ल्या थार गाडयेच्या अपघातांत रविश राजेंद्र कोमरपंत (24, राजबाग, तारीर) ह्या तरणाट्याक मरण आयलें जाल्यार दिव्या ठाकूर आनी रक्षित राज गंभीर जखमी जाल्यात. तांचेर हॉस्पिटलांत उपचार चलतात.
रवीश, रक्षीत आनी दिव्या रातच्या काळखांत केए o4 NG 0111 क्रमांकाच्या थारीन चापोली धरणाच्या वाठारांत गेल्ली. ह्या वाठारांत खूब अशीर ओल्तां आसात. ह्याच ओल्तांचेर मध्यानरातीं सुमार 3 वरांचेर रवीशाचो गाडये वयलो ताबो गेलो आनी तिणें कुशीक आशिल्ल्या व्हडल्या फातराक नेटाचो धपको दिलो. अपघात इतलो भिरांकूळ आशिल्लो की ड्रायव्हराचें वटेनचो गाडयेचो टायर सुटलो. तशेंच गाडयेच्या फुडल्या भागाचें बरेंच लुकसाण जालें. हातूंत राजबागच्या तारीर वाठारांत रावपी रविशाक जाग्यारूच मरण आयलें. जाल्यार 28 वर्सां पिरायेचो रक्षीत राज आनी दिव्या ठाकूर गंभीर जखमी जालीं. तांकां मडगांवच्या दक्षीण गोंय जिल्लो हॉस्पिटलांत उपचारा खातीर व्हेलीं. थंयच्यान रक्षीताक फुडल्या उपचारा खातीर जीएमसींत धाडलो. जाल्यार दिव्याचेर जिल्लो हॉस्पिटलांत उपचार सुरू आसात. काणकोण पुलिसांनी पंचनामो केलो आनी फुडलो तपास करतात.
मजगतीं, मेळिल्ले म्हायती प्रमाण, 28 वर्सां पिरायेचो रक्षीत मूळ कर्नाटकांतल्या बेंगळुरूचो आसून ताणें राजबागांत एक हॉटेल भाड्यान चलोवपाक घेतलां. जाल्यार ताची इश्टीण दिव्या मूळ गुजरातची. रविश हो पर्यटक टॅक्सी चालक आनी ताची स्वताची टॅक्सी आसा. रविशाच्या घरा ताची एकलीच आवय आसा. रवीशाच्या अपघाती मरणाक लागून दुख्ख पातळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
