भांगरभूंय | प्रतिनिधी
अखेरेक गोंयांतल्या 186 पंचायतीं खातीर जाल्ल्या वेंचणुकांचें निकाल जाहीर जाल्यात. 64 उमेदवार पयलींच विरोधा विणें वेंचून आयिल्ले. उरिल्ले काल जैतिवंत जाले. गोंयचे शिल्पकार भाऊसायब बांदोडकार हांची पुण्यतीथ काल सगल्यांनी पाळ्ळी. योगायोगान कालूच राज्याची खऱ्या अर्थान बुन्याद आशिल्ल्या स्वराज्य संस्थांचे प्रतिनिधी सत्तेर आयल्यात. ‘खरो देश गांवांनी वसता. गांवांची उदरगत करपाक सगल्यांनी थंय वचपाक जाय. गांव सुदारले जाल्यार आपशीच देश वयर सरतलो’, अशें महात्मा गांधीजी म्हणटाले. वेंचून आयिल्ल्या सगल्या पंचांक परबीं. आतां तांची जापसालदारकी वाडल्या. आपलो गांव सुदारचो, हे खातीर दरेकल्याच्या मनांत कांय विचार, कल्पना आसतल्यो. त्यो चालीक लावपाची संद तांकां मेळ्ळ्या. जे हारले तांणीय निर्शेवचें न्हय. जैतिवंत जाल्ल्यांक तांणी उदरगती खातीर तेंको दिवचो. कानांत वारें वचून ते उधळचे नात, हाचीय तांणी दोळ्यांत तेल घालून जतनाय घेवची. निमणो गांवाचो प्रस्न आसा. तो सुदारलो जाल्यार आमी सुदारतले, गोंय सुदारतलें.
186 मदल्या देडशें पंचायतींनी भाजपाक स्पश्ट भोवमत मेळ्ळां. उरिल्ल्या पंचायतींतले उणेच 50 टक्के पंच भाजपाचे आसात, अशें मुख्यमंत्री डाॅ. प्रमोद सावंत हांणी काल सांजवेळा सांगलें. साबार पंचायतींचें नवे प्रतिनिधी तांकां मेळपाक पणजे आयिल्ले. खंयचेंय पंचायत मंडळ वेंचून आयलें काय ताका सरकारा वटेन रावचेंच पडटा. कांय जाहीरपणान रावतात, तर कांय भितरल्यान. निमणो प्रस्न आसता, उदरगतीचो. साबार विकाकामां, येवजण्यो गांवांनी व्हरतलो जाल्यार सरकारा आड दोन हात करप समा न्हय. उरफाटे दोनाचे चार हात करून सरकारा वांगडा रावल्यार उदरगतीची गंगा गांवांनी हाडप सोंपें. कामांय झपाझप जातात. हो हालींच्या काळांतलो जागतिक सिद्धांत. काँग्रेसीन पसून हें मान्य केलां. ताकाच लागून तांच्या बऱ्याच लोकप्रतिनिधींनी पक्षबदल केला.
पंचायत वेंचणुकांनी भाजपाक मेळ्ळ्या त्या येशांत मुख्यमंत्री प्रमोद सावंत हांचें योगदान आसा, हें राजकी जाणकारांनी मान्य केलां. जिल्हो पंचायत, विधानसभा आनी आतां पंचायत वेंचणुको. आपल्या खंबीर, प्रामाणीक फुडारपणान तांणी राजकी मळाचेर एका फाटोफाट एक जैताचे बावटे हुबयल्यात. तांकां अपशकून करपाचो यत्न जालो. पूण तातूंतल्यान ते भायर सरले. आयच्यान थळाव्या स्वराज संस्थांच्या प्रतिनिधींचे हात बळिश्ट करपाक तांकां वावुरचें पडटलें आनी जिखून आयिल्ल्या नव्या- पोरण्या लोकप्रतिनिधींनय तांकां वांगड दिवचो पडटलो. कारण निमणी आमकां सगल्यांक मतभेद विसरून एकवटान गोंयची उदरगत करपाची आसा. सगल्या मळांचेर आमचे मायभुंयेक देशांत पयलो क्रमांक मेळोवन दिवपाचो आसा…. आनी तातूंत आमकां येश मेळटलें. दुबाव ना.
पंच वेंचून आयले. फाल्यां ते सरपंच, उपसरपंच जातले. तांणी फक्त गांवचो विकास हेंच ध्येय नदरे मुखार दवरून वावुरपाक जाय. ज्यो तरणाट्यो, बायलो वेंचून आयल्यात, तांणी आपल्या राजकारणी भाव, घोवाक चार हात पयसूच दवरचे. नाल्यार ताचो गांवाचेर परिणाम जातलोच, पूण संबंदीत पंचाची कारकिर्दूय पेड्ड्यार जातली. पयसो आयज आसा, फाल्यां ना. मात एकदां बदनाम जाल्लें नांव निमणे मेरेन उरता. आदले मुख्यमंत्री लक्ष्मीकांत पार्सेकार हांणी हे वेंचणुकेंत उदका सारको पयसो व्हांवला असो आरोप केला. खर्चाचे मर्यादे परस 100 पटींनी चड खर्च जाला. एकल्यान तर 50 लाख रुपया मोडल्यात, अशेंय तांणी म्हणलां. म्हणटकच संबंदीत उमेदवार (वा ताचे उमेदवार) जर वेंचून आयला आसत, तर खर्च केल्लो पयसो वसुल करपाचो यत्न तो उमेदवार करतलोच. मतदारांनीय हाचो पयलींच विचार करपाक जाय. वेंचणूक आयोगाक हें खबर आसा, जाल्यार तांणी चवकशी करूंक फावो.
पंचायतीचीं साबार कामां. ताका पाळो दिवप आतां दरेका पंचाचें कर्तव्य. हातूंतलें एकूय काम वादग्रस्त थारचें ना, हाचीय जतनाय पंच परमेश्वरांक घेवची पडटली. बरेच निर्णय स्वताचे तकलेन घेवचे पडटले. वयल्यान आदेश येतात तशी मान हालयल्यार घणसा बैल आनी आमचे मदीं फरक कितें उरलो? सामान्य लोकांक जे लागींचे आसात, ते प्रस्न पयलीं सोडोवचे पडटले. उदक, लायट, कोयर, येरादारी हे प्रस्न मुखेलपणान हाताळचे पडटले. सरकारी येवजण्यो लोकांच्या दारांत व्हरच्यो पडटल्यो. निदान नवे पंच नेटान काम करतले, अशी आस्त बाळगुया.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
