भांगरभूंय | प्रतिनिधी
भुवनेश्वर: नव्यानूच लग्न जाल्ल्या जोडप्याच्या लग्नाचें ‘रिसेप्शन’ हुबळी करपाचें थारायलें. कार्यावळीची सुवात सजयली. सोयरे आयले कार्यावळ सुरू जाली. खूबशे यत्न करून लेगीत नवें जोडपें रिसेप्शनाक पावूंक शकलें ना. तांणी निमाणें ऑनलायन स्क्रिनीचेर रिसेप्शन पळयलें. ऐन वेळार इंडिगो कंपनीचें भुवनेश्वर ते बंगळुरू, हुबळी विमान रद्द जाल्ल्यान ह्या जोडप्याक व्हड मोल मेजचें पडलें, आनी आपल्याच लग्नाच्या रिसेप्शनाक स्क्रिनीचेर ऑनलायन हाजेरी लावची पडली.
हुबळीचें मेधा क्षीरसागर आनी भुवनेश्वरचो संगमा दास ह्या तंत्रज्ञान मळा वेल्यान जोडप्याचे बाबतींत ही घडणूक घडली. हे विशींचो व्हिडियो सद्या सुमारा भायर व्हायरल जायत आसा.
हुबळीचें मेधा क्षीरसागर आनी भुवनेश्वरचो संगमा दास हें जोडपें बंगळुरूंत रावता. 23 नोव्हेंबर दिसा भुवनेश्वरांत तांचें लग्न जालें. उपरांत हुबळींतल्या गुजराती भवनांत परंपरीक रिसेप्शन दवरिल्लें. ते खातीर तांणी इंडिगो विमानाच्यो तिकेटी घेतिल्ल्यो. 2 डिसेंबर दिसा भुवनेश्वर सावन बंगळुरू आनी उपरांत हुबळी वचपाचें आशिल्लें. पूण बुधवारा विमानूच रद्द जालें आनी तांचें सगलें नियोजन मातयेभरवण जालें. आपल्या लग्नाच्या रिसेप्शनाचें थळ गांठपा खातीर तांणी खूब यत्न केले. कुटुंब, सोयरीं कार्यावळीच्या थळार सजावट करून आनी सगली तयारी करून वाट पळयतालीं. निमाणें ह्या जोडप्याक आपल्या रिसेप्शनाक स्क्रिनीचेर ऑनलायन उपस्थिती दाखोवची पडली.
इंडिगो विमान सेवेचो गोंदळ
मजगतीं, इंडिगोच्या विमान सेवेचेर परिणाम जाल्ल्यान फाटल्या कांय दिसांनी प्रवाशांक बरेच त्रास सोंसचे पडल्यात. इंडिगो कंपनीच्या विमान सेवेंतल्या गोंदळाकल लागून 500 देशां भितरलीं आनी आंतरराष्ट्रीय उड्डाणां रद्द केल्यांत. शुक्रारा देशांतलीं सुमार 400 विमान उड्डाणां रद्द केलीं. कर्मचाऱ्यांचो उणाव आनी तंत्रीक समस्यांक लागून ही विमान उड्डाणां रद्द केल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
