भांगरभूंय | प्रतिनिधी
आरजीपीचे आमदार विरेश बोरकार हांची म्हायती
पणजीः कॉंग्रेसीन फाल्यां फाल्यां करीत युती विशींच्या निर्णयाक कळाव केला. वेळ उणो आशिल्ल्यान आमी दोन पावलां फाटीं पावल्यात. देखून आनीक वेळ वगडाय नासतना आमी २६ मतदारसंघांनी उमेदवार जाहीर करुन उमेदवारी अर्ज भरल्यात. युती विशींची फुडली म्हायती पत्रकार परिशदे वरवीं सांज मेरेन कळयतले, अशें रेव्ह्युलेशनरील गोवन्स पक्षाचे (आरजीपी) आमदार विरेश बोरकार हांणी सांगलें.
आरजीपीन आयज सकाळीं १४ उमेदवारांची वळेरी जारी करून कॉंग्रेसीच्या उमेदवारा आड आपले उमेदवार उबे केल्ल्यान युती लागसार सपुश्टांत आयल्या. आयज आरजीपीचे चिंबल, सांतांक्रुझची आनी सेंट लोरेन्सच्या उमेदवारांनी अर्ज दाखल केले. ह्या वेळार विरेश उलयताले.
युतीचो फुडार कितें आनी उमेदवार उबे करपाचें पावल आमी कित्याक घेतलें, हें नेमकें जालें कितें हे विशींची म्हायती आरजीपीचे फुडारी आनी अध्यक्ष आय सांजे मेरेन दितले, अशें बोरकार हांणी म्हणलें.
फुडें कितेंय जातलें म्हण आमी कितलेशेच दिस वाट पळयताले. ते भायर कॉंग्रेसीचे आमदार एल्टन डिकोस्टा हांणी सांगिल्लें जी १२ सीटां आमी जाहीर केल्लीं तीं आमका वाटप केल्लीं. मात हे विशीं कसलें केस्तांव नासतना लेगीत पांचवें सिग्नल केन्ना मेळटलें हाची आमी वाट पळयताले, अशें बोरकार हांणी सांगलें.
आचारसंहीता लागू जावन कितले दिस जावन गेले. आमी वाट पळयताले मात फुडली कृती जायनासली. आमी आमचें काम फुडें व्हेलां आनी हे विशींचें सगळें स्पश्टीकरण जशें, हें कोणाक लागून घडलें, कित्यात लागून घडलें आनी हाका कोण जापसालदार आसा तुमका दितलें, अशें बोरकार हांणी स्पश्ट केलां.
आमचीं पावलां खूब फाटीं पडल्यांत आनी आमी आनीक कळाव करपाक शकना. भाजपान चाळीसय उमेदवार जाहीर केल्यात. अपक्षाक आनी मगोक तेंको दिल्लो आसा देखून आमकां फुडे सरपाक जाय. आमी खूब फाटीं आसात आनी जे दिस उरिल्यात तातूंत आमकां उमेदवारी अर्ज भरून हेर वेचणुकेची प्रक्रीया पुराय करपाक जाय, अशें बोरकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
