भांगरभूंय | प्रतिनिधी
पेडणें: ओंकार हती सध्या उगवें कासुले वाठारांत पावला. हांगा येवन तांणी कवाथे, केळींचें लुकसाण करीत गांवांत येवन वाहनांचेंय लुकसाण करपाक सुरवात केल्या. एके तांबडे आनी धवे गाडयेचें लुकसाण जालां. हाका लागून लोक भियेल्यात. रातच्या ८ वरां उपरांत ओंकार हती लोक वस्तींत येवन लोकांची न्हिद मोडटा. हती खंय वता? कितें करता? फकत हाचेरूच रान खात्याचे अकिारी पाळत दवरून आसात. आजूनय सरकाराचे दोळे कित्याक उगडनात? तशेंच लोकप्रतिनिधी हाचे कडेन प्रतिक्रिया दिवपाक वेळ कित्याक काडटा?
जाल्यार दुसरे वटेन उगवेंच्या लोकांनी सरकारान शिटकावणी दीत, सरकारान आमचे सहनशीलतेचो अंत पळोवचो न्हय. कायदो हातांत घेतल्या उपरांत थळाव्यांक दोश दिवचो न्हय. ताचे पयलीं ह्या ओंकार हतयाचो बंदोबस्त बेगोबेग करचो, अशी मागणी शेतकारांनी केल्या.
ओंकार हती फाटल्या चार दिसां आदीं उगवें वाठारात येवन कवाथे, केळीं खावपा वांगडाच चार चाकी वाहनांचें लुकसाण केलें.
रान खात्याचे मंत्री विश्वजीत राणे हांणी बेगोबेग ह्या हतयाचेर उपाय येवजण करची, अशी मागणी मोपा सरपंच सुबोध महाले हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
