भांगरभूंय | प्रतिनिधी
पणजी : केंद्रीय गृह मंत्रालयान २०२५ खातीर गोंयच्या दिवचल पुलीस स्टेशनाक भारतांतल्या पांचव्या नंबराचें उत्कृश्ठ पुलीस स्टेशन म्हणून मान्यताय दिल्या.
दिवचल पुलीस निरीक्षक विजय राणे, उपअधीक्षक श्रीदेवी बी. व्ही. आनी तेन्नाचे पुलीस अधीक्षक राहुल गुप्ता हांच्या फुडारपणा खाला दिवचल पुलीस स्टेशनान गुन्यांवकारी नियंत्रण आनी सोदांत उत्कृश्ठ कामगिरी केल्ली. तशेंच फाटल्या स म्हयन्यांत पुलीस स्टेशनांत मुळाव्या सुविधांनीय वाड केल्ली.
भुरग्यां खातीर कूड. जिम, कर्मचार्यां खातीर दर्जेदार कॅन्टीन, नितळसाण बॅरेक्स आनी हेर गजालींचो हातूंत आसपाव आसा. सप्टेंबरांत गृह मंत्रालयाच्या स्वतंत्र पंगडान केल्ल्या सर्वेक्षणांत ह्या सगल्या निकशांचो विचार केल्लो. दिवचल पुलीस स्टेशनाक राष्ट्रीय पांवड्यार मेळिल्ली मान्यताय ही गोंय पुलीस आनी गृह विभागा खातीर अभिमानाची गजाल आशिल्ल्याचें सांगतात. सगल्याक तोखणाय जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
