भांगरभूंय | प्रतिनिधी
पणजी: गोंय पुलीस खात्यांत २००२ त भरती जाल्ल्या उपनिरीक्षकांच्या ज्येश्ठता वळेरे विशीं गोंयच्या मुंबय उच्च न्यायालयान दिल्ल्या आदेशाक भारतीय राखीव दळांतल्या निरीक्षकांनी सर्वोच्च न्यायालयांत दिल्लें आव्हान शुक्रार ५ डिसेंबराक सर्वोच्च न्यायालयान भायर मारलें. हाका लागून उच्च न्यायालयाच्या निर्णयाचेर शिक्को मारिल्ल्यान, गोंय पुलिसांच्या २००२ च्या बॅचच्या उपनिरीक्षकांक व्हड समादान मेळ्ळां. गोंय पुलिसांचे वतीन ज्येश्ठ ऍड. आत्माराम एन. एस. नाडकर्णी, ऍड. गॅलिलिओ टेलिस आनी ऍड. साल्वादोर संतोष रेबेलो हांणी युक्तिवाद केला.
तेन्नाचे पुलीस निरीक्षक ब्रुटानो पाशेको आनी सुदेश वेळीप हांणी २०२३त उच्च न्यायालयांत याचिका दाखल केल्ली. उपरांत निरीक्षक प्रवीण पवार आनी हेरांकूय याचिका दाखल करून गोंय पुलीस आनी भारतीय राखीव दळाची एकत्रीत ज्येश्ठता वळेरेक सर्वोच्च न्यायालयांत आव्हान दिल्लें. ह्या याचिकांत खात्यान २३ मार्च २०२३ दिसा जारी केल्ल्या एकत्रीत निमाणी ज्येश्ठता वळेरेक आव्हान दिल्लें. हे याचिकेंत आयआरबीच्या पुलीस निरीक्षकांक प्रतिवादी केल्लें.
उच्च न्यायालयाचो आदेश
ह्या प्रकरणांत सुनावणी घेतले उपरांत उच्च न्यायालयान खात्यान जारी केल्ली एकठांय ज्येश्ठता वळेरी रद्द केली. तशेंच, याचिकाकर्त्यांची बाजू उखलून धरून, पुलीस खात्यांत २००२त भरती जाल्ल्या उपनिरीक्षकांक दिल्ली हंगामी बढती नेमान थारावन तांची ज्येश्ठता वळेरी २०१३ सावन तयार करपाचो आदेश दिल्लो. ही प्रक्रिया तीन म्हयन्यांच्या भितर पुराय करपाचे निर्देशूय न्यायालयान जारी केल्ले.
सर्वोच्च न्यायालयाचो निर्णय
उच्च न्यायालयाच्या ह्या आदेशाक आयआरबीचे निरीक्षक दामोदर नायक आनी हेरांनी सर्वोच्च न्यायालयांत आव्हान दिल्लें. हे आव्हान याचिकेचेर आयज सुनावणी जाली. हे सुनावणे मजगतीं सर्वोच्च न्यायालयान आयआरबी अधिकार्यांची याचिका भायर मारून उच्च न्यायालयाचो आदेश कायम दवरलो. ह्या निर्णयाक लागून, गोंय पुलीस दळांतले २००२ त भरती जाल्ल्या उपनिरीक्षकांक २०१३ सावन नेमान ज्येश्ठताय मेळटली, तांच्या पदोन्नतीच्या मार्गांतलीं व्हड आडमेळीं पयस जाल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
