भांगरभूंय | प्रतिनिधी
पणजी : कला अकादमीची रिपर्टरी कंपनी (रंगमेळ) कोरोना म्हामारीक लागून बंद करची पडिल्ली. उपरांत कला अकादमी इमारतीचे दुरुस्ती खातीर चालू आशिल्ल्या कामांक लागून रिपर्टरी कंपनी परतून चालू जावपाक चडूच कळाव जालो. कला अकादमीच्यो सगल्यो कार्यावळी परतून चालू जाले परांत लेगीत रिपर्टरी परतून सुरू जावपाचीं कसलींच चिन्नां दिसनाशिल्लीं. हे कातीर गोंयच्या नाट्य कलाकारां मदीं आनी प्रेक्षकां मदीं नाराजी आशिल्ली. कला अकादमीचे नव्यान नेमणूक जाल्ले अध्यक्ष चंद्रकांत (बाबू) कवळेंकार हांच्या फुडाराकारान खूब वाट पळयले उपरांत रिपर्टरी कंपनी परतून चालू जाल्या.
परतून चालू जाले उपरांत रिपर्टरीन आपलें पयलें नवें नाटक ‘धरती आबा’ सादर केलें. भगवान बिरसा मुंडा हांचे जिणेचेर आदारीत हें हिंदी नाटक, अनुसुचीत जमाती कल्याण संचायलनायाच्या पालवान निर्मीत केल्लें. लेखक ह्रषिकेश सुलभ आनी दिग्दर्शक सुशांत नायक हांच्या फुडारपणा खाला खूबश्या गोंयच्या नामनेच्या कलाकारंनी आनी तंत्रज्ञांनी हे निर्मितींत वांटो घेतिल्लो. हें नाटक सेरेंडिपीटी आर्ट्स फेस्टीवला खातीर वेंचलां.
कला अकादमीची रंगमेळ ही रिपर्टरी कंपनी 1993 वर्सा सुरू जाली. स्थापने सावन आयज मेरेन रिपर्टरीन सादर केल्ल्या नाटकांनी गोंयांत तशेंच राष्ट्रीय आनी आंतरराष्ट्रीय माचयेर आपली वेगळी वळख निर्माण केल्ली. हल्या हिर्रर्र, प्रेमजागोर, खपसुरत बहू, प्रेमजागोर अश्या कितल्याश्याच उत्कृश्ट नाटक सादरीकरणान प्रेक्षकांचीं मनां जिखिल्लीं. 15 प्रशिक्षीत आनी 10 हौशी माचये वयले अणभवी कलाकारांच्या आदारान गोंयक गिरेस्त, उगडासांत उरपा सारत्यो आनी अर्थपूर्ण सादरीकरणाचें देणें दिवपाचो वावर रिपर्टरी कंपनीन केल्लो.
रिपर्टरी कंपनीचे गरजे विशीं अध्यक्ष कवळेंकार हांणी सांगलें, नाट्यशिक्षण पुराय करून कारकिर्दीचे सुरवेक संघर्श करपी युवा कलाकारांक आलाशिरो आनी कामाची संद मेळटा. हौशी आनी प्रतिभावान कलाकारांक शिस्तबद्ध आनी वेवसायीक माचयेर शिकपाची संद मेळटा. रंगमाची तंत्रज्ञान- नेपथ्य, उडवाड येवजण, वेशभुषा, संदीत हांच्या सेगीत उदरगतीक चालना मेळटा. सामान्य नाट्यसंस्था करपाक शकनात अशीं प्रायोगीक, आशयघन आनी धाडरी नाटकां सादर करपाक मेळटा. माची परंपरेक परतून नवें जिवीत दिवन रंगमेळ फुडल्या काळांत कलाकार, तंत्रज्ञ आनी रंगकर्मी खातीर व्हड थाकाय दिवपी घडणूक थारतली. तशेंच गोंयांतले नाट्यकलेचो दर्जो आनीक वयर सरतलो, अशी आस्त अध्यक्ष कवळेंकार हांणी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
