फेरीबोटीचे हायड्रॉलीक यंत्रणेंत बिघाड

भांगरभूंय | प्रतिनिधी

खूबशे प्रवासी जखमी : रायबंदर- चोडण न्हंयमार्गा वयली घडणूक

भांगरभूंय । प्रतिनिधी

पणजी : चोडण – रायबंदर मार्गार सेवा दिवपी ‘मडगांव’ फेरीबोटीचे हायड्रॉलीक यंत्रणेंत मंगळापा सांजेच्या 6.30 वरांच्या सुमाराक अचकीत बिघाड जाल्ल्यान व्हड गोंदळ जालो. ह्या तांत्रीक बिघाडाक लागून फेरीबोटीचो रॅम्प अचकीत खाला आयलो. रॅम्पाचेर उबे आशिल्ल्या खूबश्या प्रवाश्यांचो तोल गेल्ल्यान ते खाला पडले. ते खातीर खूब जाणांक किरकोळ दुखापत जाली.

सध्या चोडण- रायबंदर मार्गार 4 पोरण्यो फेरीबोटी आनी 2 रॉपेक्स फेरी चलतात. पोरूंचे तुळेंत ह्या मार्गा वयली गर्दी लेगीत चारपटींनी वाडल्या. गडबडीन फेरीचालक खूब खेपे चुकीचे पद्दतीन फेरी धक्यार लायतात. ते खातीर गाडयो फेरीबोटींत घालतना आनी भायर काडटना प्रवाश्यांक सदांच धोको पत्करचो पडटा. हायड्रोलीक बिघाडाक लागून आबूज जाल्ले स्थितींत रॅम्पाचेर उबे राविल्ल्या प्रवाश्यांक किरकोळ दुखापती जाल्यो, जाल्यार कांय जाण फेरीबोटींत आशिल्ल्या गाडयांक आपटले. हातूंत एका पुलीस कर्मचाऱ्याचो मोबायल फोन उदकांत पडलो. तशेंच एके बायलेक तिचे गाडये सयत उदकांत पडटा पडटा वाटायली.

हे घडणुके उपरांत खुबळिल्ले कांय प्रवाशी थेट फेरीबोट चालकाच्या कँबिनांत गेले. ताच्या घाळपणाक लागून ही घडणूक घडली, अशें सांगून ताचेर प्रस्नांचो शिंवर केलो. फेरीबोट चालकान, हायड्रोलीक बिघाडाक लागून ही घडणूक घडली अशें सांगलें, तशेंच वयल्यान कांय दिश्टी पडना अशी जाप दिवन वेळ मारून व्हरपाचो यत्न केलो. ताच्यो बेजापसालदार जापो आयकून प्रवाशी चडूच खुबळ्ळे आनी तांणी प्रशासनाचे भुमिकेचेर खर नाराजी उक्तायली. ह्या मार्गार पोरण्यो फेरीबोटी आनी फेरी कर्मचाऱ्यांचीं घाळपणा वाडत आसात. ह्याच कारणांक लागून खूब खेपे किरकोळ अपघात जावप, फाटले गाडयेचो धपको फुडले गाडयेक बसून लुकसाण जावप, ही आतां सामान्य गजाल जाल्या. ही घडणूक म्हणल्यार सरकाराचे आडनदरेक लागून प्रवाश्यांचे सुरक्षे कडेन तडजोड करप. ह्या मार्गार सुरक्षीत फेरीबोटी आनी चड अणभवी तशेंच जापसालदार कर्मचाऱ्यांची ताकतिकेन नेमणूक करची, ना जाल्यार फुडारांत व्हड दुर्घटणा जावं येता, अशी भिरांत प्रवाश्यांनी उक्तायली आनी प्रवाशांचे सुरक्षे खातीर तत्काळ उपाय येवजण करची, अशी मागणी केली. तेचवरी हे घडणुकेची ताकतिकेन दखल घेवन दोशींचेर खर कारवाय करची, अशेंय मागलें.