यूके व्हाया पुर्तुगाल वचपी गोंयकारांचो आंकडो देंवता

भांगरभूंय | प्रतिनिधी

पणजी : सोंपेंपणी नोकरी मेळची हे खातीर पुर्तुगीज पासपोर्ट घेवन यूके वचपी गोंयकारांचो आंकडो आतां उणो जावपाक लागला. हाचे आदीं खूबशे गोंयकार नोकरी, वेवसाया खातीर युरोपांत वताले. ते खातीर भारतीय नागरिकत्व सोडून पुर्तुगीज नागरिकत्व घेताले. युरोपियन युनियन आनी चड करून युनायटेड किंगडमांत (यूके) नोकरी, वेवसाया खातीर राबितो करून रावप सोंपो जावचें हें खातीर भारतीय नागरिकत्व सोडून पुर्तुगीज पासपोर्ट घेताले.

आतां पुर्तुगीज नागरिकत्व घेवन यूके, युरोपांत वचपी गोंयकारांचो आंकडो उणो जावपा फाटल्यान खूबशीं कारणां आसात. सहजतायेन नोकरी मेळोवपा खातीर यूके आतां आदले वरी सुवात उरूंक ना. नागरिकत्व मेळोवचे खातीरची प्रक्रिया किचकट जाल्या. आदले वरी सुविधा लेगीत आतां उपलब्ध नात. पुर्तुगीज नागरिकत्व मेळोवचे खातीर आतां चार वर्सां लागतात. दीं एका वर्सा परस उण्या काळांत नागरिकत्व मेळटालें. खर नेम आनी कागदपत्रांची खर तपासणी जाता. पुर्तुगीज नागरिकत्वा खातीर प्रक्रिया करतना भारतीय अधिकारिणी कडल्यान कागदपत्रांची पडटाळणी करचे खातीर खूब वेळ घेतात. कागदपत्रांची प्रक्रिया चड कठीण जावप, आयरलॅण्ड, नेदरलॅण्ड, जर्मनी ह्या सारकिल्ल्या देशांत वचपा खातीर प्राधान्य, ह्या कारणांक लागून हो आंकडो उणो जाला, अशी म्हायती मुखार आयल्या.

वट्ट आंकडेवारी पळयत जाल्यार पुर्तुगीज नागरिकत्व घेवन युरोपी देशांत वचपी गोंयकारांचो आंकडो खुबूच उणो आसा. 2015 सावन सुमार 26 हजार गोंयकारांनी तांचे भारतीय पासपोर्ट सोडले. मात आतां हो आंकडो सामकोच उणो जाला. 2022 त 1,265 गोंयकारांनी भारतीय पासपोर्ट सोडले. 2021 त 2,835 जाल्यार 2015 ते 2019 ह्या काळांत दर वर्सा सुमार 3,500 ते 4,100 जाणांनी भारतीय पासपोर्ट सोडले. अशें आसलें तरीय ह्या आंकड्यांत दूतावासा मुखार भारतीय नागरिकत्व सोडप्यांचो आस्पाव ना.

प्रादेशीक पासपोर्ट कार्यालयांतल्या अधिकाऱ्यांनी दिल्ले म्हायती प्रमाण, भारतीय पासपोर्ट परत दिवपाक अर्ज येतात. मात, तातूंत आदले सारकी तत्परता ना. पुर्तुगीज पासपोर्ट मेळोवचे खातीर आनी भारतीय नागरिकत्व सोडचे खातीर दिसाक सुमार 10 ते 12 अर्ज येतात, अशें अधिकाऱ्यान सांगलें. खूबश्या निरिक्षकांच्या मतान, ‘ब्रेक्झिटा’क लागून निर्णायक ‘ब्रेक’ आयला. पुर्तुगीज नागरिकत्व आसल्यार आदीं यूकेंत बरी मागणी आनी हमी आशिल्ली. मात आतां युरोपियन युनियनांतल्यान भायर सरले उपरांत आदले सारकी मागणी उरूंक ना.

पुर्तुगीज पासपोर्ट मेळोवपाक मजत करपी सल्लागार डुआर्ट फर्नांजीस हांणी सांगलें, आदीं एका वर्साच्या काळांत नागरिकत्व मेळटालें, मात आतां चार वर्सां लागतात. पुराय नागरिकत्व मेळोवचे खातीरचे नेम खूब खर जाल्यात.

वेवसायीक ब्रुनो गोमिंडेस हांच्या म्हणण्या प्रमाण, नागरिकत्व मेळोवपाक जावपी कळाव नव्या निर्बंधांक लागून न्हय जाल्यार भारत सरकाराच्या कागदपत्रांचे पडटाळणीचे कांसवा गतीक लागून जाता.

पुर्तुगीज अधिकारी नेमान दरेका अर्जदारा कडल्यान स्पश्टीकरण मागतात आनी जलद प्रक्रिया करतात. पूण तांणी सांगलें, अर्ज वेळार पुराय जातले हाची खात्री करचे खातीर भारतीय अधिकाऱ्यांनी हे पडटाळणीक तत्काळ प्रतिसाद दिवपाक जाय. जल्म आनी लग्न पडटाळणी बेगीन करपाची गरज आसा, अशें गोमिंडेस हांणी सांगलें.