भांगरभूंय | प्रतिनिधी
पणजी: गोंयांत आण्विक ऊर्जा प्रकल्प सुरू करपा विशीं सध्या तरी कसलोच प्रस्ताव ना. मात, प्रस्ताव आयल्यार फुडाराक अशे तरेच्या प्रस्तावांचेर विचार करूं येता, अशी म्हायती केंद्रीय कार्मिक खात्याचे राज्यमंत्री डॉ. जितेंद्र सिंग हांणी लोकसभेंत एके लेखी जापेंत दिली. आयज बुधवारा ह्या विशयाचेर खासदार विरीयातो फर्नांडीस हांणी अतारांकीत प्रस्न विचारिल्लो.
खासदार फर्नांडीस हांणी फुडाराक गोंयांत अणुऊर्जा प्रकल्प सुरू करपाचो किते प्रस्ताव आसा? हे खातीर राज्य सरकाराक विस्वासांत घेतलां व्हय? राज्य सरकारान हे खातीर मान्यताय दिल्या? प्रकल्पा खातीर सुवातेची निवड केल्या काय? प्रकल्प ऊर्जा निर्मिती सयत लश्करी कामां खातीर वापरतले काय? आनी प्रकल्पा खातीर पर्यावरणीय प्रभाव मुल्यांकन केलां काय? अशे जायते प्रस्न विचारिल्ले. हाचेर, गोंयांत सध्या कसलेच तरेचो प्रस्ताव नाशिल्ल्यान हेर प्रस्नाच्यो जापो दिवंक मेळनाशिल्ल्याचें जापेंत स्पश्ट केलां.
ह्यान पयलीं मे म्हयन्यांत केंद्रीय मंत्री मनोहरलाल खट्टर हांणी तांचे गोंय भेटी मजगतीं राज्यांत आण्विक ऊर्जा प्रकल्पाचो प्रस्ताव आशिल्ल्याचें सांगिल्लें. गोंयांत आण्विक, जल लायट, सौर वा हेर खंयचोय वीज निर्मिती प्रकल्प नाशिल्ल्यान तांणी आण्विक ऊर्जा प्रकल्पाचो प्रस्ताव आशिल्ल्याचें मत उक्तायल्लें.
ह्या विधानाचेर राज्यांतल्या विरोधी पक्षांनी टिका केल्ली. गोंय सारकिल्ल्या सैमान नटिल्ल्या राज्यांतआण्विक ऊर्जा प्रकल्पाची गरज कितें? असो प्रस्न हाजीर केल्लो. उपरांत मुख्यमंत्री डॉ. प्रमोद सावंत हांणी, गोंय ल्हान राज्य आशिल्ल्यान हांगा अशे तरेचो प्रसकल्प जावचो ना हें स्पश्ट केल्लें. केंद्रीय मंत्री खट्टर हांणी वीजपुरवणे विशीं कांय पर्याय सुचयिल्ले, तातूंत आण्विक वीज प्रकल्पाचो आसपाव आशिल्लो. मात, गोंयची भौगोलीक स्थिती पळयल्यार असो प्रकल्प गोंयांत जावपाक शकना, अशें मुख्यमंत्र्यांनी सांगिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
