भांगरभूंय | प्रतिनिधी
पणजी : नोकरी मेळप सोपें जावचे खातीर पुर्तुगीज पासपोर्ट घेवन युके वचपी गोंयकारांचो आंकडो आतां उणो जावपाक लागला. ह्यान पयलीं खुबशे गोंयकार नोकरी, वेवसाया खातीर युरोपाक वताले. ते खातीर भारतीय नागरिकत्वाचो त्याग करून पुर्तुगेज नागरिकत्व घेताले. युरोपियन युनियन आनी विशेश म्हळ्यार युनायटेड किंग्डमांत (यूके) नोकरी, वेवसाया खातीर रावप सोपें जावचें म्हूण भारतीय नागरिकत्वाचो त्याग करून पुर्तुगेज पासपोर्ट घेताले.
आतां पुर्तुगेज नागरिकत्व घेवन युके, युरोपांत वचपी गोंयकारांचो आंकडो उणो जावपा फाटलीं कारणां जायतीं आसात. सहज नोकरी मेळोवपा खातीर युके आतां आदले वरीं सुवात उरूंक ना. नागरिकत्व मेळोवपा खातीर प्रक्रिया खाचकटीची जाल्या. पयलीं सारकिल्ल्यो वेवस्थाय आतां उपलब्ध नात. पुर्तुगेज नागरिकत्व मेळोवपाक आतां चार वर्सां लागतात.
पयलीं एक वर्सा परस उण्या काळान नागरीकत्व मेळटालें. खर नेम आनी कागदपत्रांची खर चवकशी. पुर्तुगेज नागरीकत्वाची प्रक्रिया करतना भारतीय अधिकार्यान कागदपत्रांची खात्री करपाक घेतिल्लो वेळ. कागदपत्रांची प्रक्रिया चड कठीण जाल्या, आयर्लंड, नेदर्लंड, जर्मनी आदी देशांनी वचपाची पसंती, अशा कारणांक लागून हो आंकडो उणो जाल्ल्याची म्हायती मुखार आयल्या.
एकंदर आंकडेवारी पळयल्यार पुर्तुगेज नागरीकत्व आशिल्ल्या युरोपीय देशांनी वचपी स्थलांतरीत लोकांचो आंकडो खूब उणो जायत आसा. २०१५ वर्सा सावन सुमार २६ हजार स्थलांतरीतांनी आपले भारतीय पासपोर्ट सोडले. पूण आतां हो आंकडो सामकोच उणो जाला. २०२२ वर्सा फकत १ हजार २६५ स्थलांतरीतांनी भारतीय पासपोर्ट सोडले. २०२१ वर्सा २ हजार ८३५ जाणांनी पासपोर्ट सोडलो. २०१५ ते २०१९ ह्या काळांत दर वर्सा सुमार ३ हजार, ५०० ते ४ हजार, १०० लोकांनी आपले भारतीय पासपोर्ट सोडले. पूण ह्या आंकड्यांत दूतावास मुखार आपलें भारतीय नागरीकत्व सोडपी लोकांचो आस्पाव ना.
प्रादेशीक पासपोर्ट कार्यालयाच्या अधिकार्यांनी दिल्ले म्हायती प्रमाण भारतीय पासपोर्ट परत करपा खातीर अर्ज येत आसात. पूण, आदले भशेन तात्काळपण ना. पुर्तुगेज पासपोर्ट मेळोवपा खातीर आनी भारतीय नागरीकत्व सोडून दिवपा खातीर दर दिसा सुमार १० ते १२ अर्ज येतात अशें अधिकार्यान सांगलें. जायत्या निरिक्षकांच्या मतान ब्रेक्झिटाक लागून निर्णायक ‘ब्रेक’ आयला. पयलीं ब्रिटनांत पुर्तुगेज नागरीकत्व आसल्यार बरी मागणी आनी हमी आशिल्ली. पूण आतां युरोपीय संघांतल्यान भायर सरल्या उपरांत पयलीं सारकी मागणी ना.
पुर्तुगेज पासपोर्ट मेळोवपाक आदार दिवपी सल्लागार डुआर्ट फर्नांडिस हांणी सांगलें, आदीं नागरीकत्व एका वर्सा भितर मेळटालें. पूण आतां चार वर्सां लागतात. पुराय नागरीकत्व मेळोवपाचे नेम चड खर जाल्यात. नव्या निर्बंधांक लागून न्हय तर भारत सरकारान कागदपत्रांचें सत्यापन करपाची गती मंद आशिल्ल्यान नागरीकत्व मेळोवपाक कळाव जाला अशें तांणी सांगलें.
पुर्तुगेज अधिकारी नेमान दरेका अर्जदाराकडल्यान स्पश्टीकरण मागतात आनी ही प्रक्रिया बेगीन करतात. तशेंच तांणी सांगलें, अर्ज वेळार पुराय जातले हाची खात्री करपाक भारतीय अधिकार्यांनी ह्या व्हॅरिफिकेशनाक बेगोबेग प्रतिसाद दिवपाक जाय. जल्म आनी लग्नाचें व्हॅरिफिकेशन बेगोबेग करपाची गरज आशिल्ल्याचें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
