भांगरभूंय | प्रतिनिधी
पणजी: पणजी मार्केटा लागसार मंगळारा सकाळीं जाल्ल्या अपघातांत गंभीर जखमी जाल्लो मुकुट ज्योती बोहरा (५०,आसाम, सध्या ताळगांव) हाका उपचारा मजगतीं मरण आयलें. नेपाळी तरणाट्यान सोर्याचे घुंवळेंत गाडी चलयतना हो अपघात घडिल्ल्याचो आरोप आसा. पुलिसांनी ताका अटक केली.
सकाळीं ८ वरांचेर पणजी मार्केट वाठारांत ही घडणूक घडली. १८ वर्सां पिरायेचो ड्रायव्हर शाहिद मोहर्रम अंसारी (नेपाळ) आपल्या कामगारांक सोडपा खातीर मार्केट वाठारांत आयिल्लो. थंयच्यान परत वतना ताचे गाडयेचो धपको बसलो. हाका लागून कांय नागरीक एकठांय जाले.
गर्देक पळोवन भियेल्ल्या चालकान गाडी फाटीं घेवपा खातीर ‘रिव्हर्स गिअर’ घालें. मात, ह्या वेळार ताणें एक्सलेटर इतल्या नेटान दामलो की, गाडी वेगान फाटीं सरली आनी सरळ फुटपाथार चडून बंद दुकानाक धपको दिलो. तो चुकोवपाक कुशीक सरपाच्या यत्नांत आशिल्लो मुकुट ज्योती बोहरा गाडी आनी वण्टी मदीं चिड्डून गंभीर जखमी जालो. ताचे वांगडा आशिल्लो एक तरणाटो मात वाटावलो. घडणुके वेळार हाजीर आशिल्ल्या लोकांनी गाडी चालक सोरो पियेला अशें सांगलें. तांणी ताका बडयलोय बी.
अपघातांत गंभीर जखमी जाल्लो मुकुट ज्योती बोहराक बेगोबेग गोमॅकोंत उपचारां खातीर व्हेलो. मांडयो, कंबर आनी धोंपरांक गंभीर दुखापत जाल्ली. उपचारा मजगतीं ताका आयज मरण आयलें.
हे घडणुके उपरांत पुलिसांनी ड्रायव्हराक ताब्यांत घेतिल्लो. वैजकी तपासणेंत तो सोर्याचे घुंवळेंत आशिल्ल्याचें उक्तें जालें. ताका अटक केल्या आनी सोरो पिवन गाडी चलोवप आनी येरादारीचे नेम मोडिल्ल्याचो गुन्यांव नोंद केला. ह्या प्रकरणाच्या तपासा खातीर पुलीस सीसीटीव्ही फुटेज आनी प्रत्यक्षदर्शींच्या जबानीचो आदार घेतात. ह्या अपघाताक लागून खुबश्या दुचाकींचेंय लुकसाण जाल्लें. मात आतां एकल्याक मरण आयिल्ल्यान हें प्रकरण आनीक गंभीर जालां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
