भांगरभूंय | प्रतिनिधी
नोवेनाक वचूं वा फेस्ताक वचूं, गोंयच्या सायबाचो उमो घेतले बगर कोण परतना. हो उमो थोड्यांक रोखडोच मेळटा जाल्यार थोड्यांक दोन- तीन वरां पासून लायनीक रावचें पड
आज, डिसेंबराचे तीन तारखेर व्हडा मोगान आनी उमेदीन आमी सां फ्रांसीस शावियेराची परब मनयतात. नीज भावार्थी ही परब चुकोवंक शकना, देखून तो परबेक न्हय जाल्यार एका नोवेनाक तरी वचून येताच. हेच खातीर दर दिसाक आनी दर मिसाक नोवेनाच्या दिसांनी आनी परबे दिसा ओल्ड गोवा उरपंजिंनी भावीक एकठांय येतात. तांचो भावार्थ इतलो अखंड की, कांय जण जेवणा- खाणाच्यो वस्तू घेवन थंय वतात आनी मेळटा त्या जाग्यार वस्ती करतात. शीं पडूं वा गर्मी जावं, माडी तें णव नोवेना आनी फेस्त करुनूच तीं घरा परततात. थोडीं 3- 4 नोवेनां करून परततात. सां फ्रांसीस शावियेरान सुमार 480 वर्सां आदीं जेजुची बरी शिकवण हांगा पसरायली आनी लोकाच्या काळजांत भावार्थ किल्लायलो, त्याच भावार्थाक जाप दिवंक हो हजारांनी लोक थंय जमा जाता.
आमी भावार्थी
आमचे कडें कसलेंच वाहन नाशिल्लें तेन्ना आमचो एक सोयरो ट्रक घेवन परबेचे आदले राती थंय वतालो. ताचे बराबर ट्रकांत बसून आमीय वताले आनी से कॅथेड्रल इगर्जे कडले बागेंत चादरां घालून न्हिदताले. दवान सायडीचें सगळें तण भिजिल्लें आसतालें म्हणल्यार आमची अवस्था कितें जावंक शक्ताली तें पळेयात. पूण गोंयच्या सायबाचो भावार्थ थंय आमकां सांबाळून दवरतालो. आमचे भशेन हजारांनी भावार्थी अजून थंय येवन रावतात, तांकां तोच सायब राखता आनी सांबाळटा.
सायबाचो उमो
नोवेनाक वचूं वा फेस्ताक वचूं, गोंयच्या सायबाचो उमो घेतले बगर कोण परतना. हो उमो थोड्यांक रोखडोच मेळटा जाल्यार थोड्यांक दोन- तीन वरां पासून लायनीक रावचें पडटा. म्हणून कोण कोणाचेर कागाळ करिना. सायबाचो भावार्थ बळ आनी घटाय दिता तितलो वेळ उबीं रावून चलूंक. थोडीं करतात बेकार हिशोब, ‘ती लायन फास्ट चलता, ही लायन सवका चलता.’ ते विसरतात भितर ल्हान भुरग्याक घेवन आशिल्ल्याक वा दुयेंत वा दिव्यांग मनशाक सायबाचो आशिर्वाद घेवंक मदीं घेवंचो पडटा म्हूण. एक फावट लायनीक उरलो म्हणटच उमो मेळटलोच न्ही, घड्ये 5- 10 मिण्टां उशीर जातलो इतलेंच.
बरी मांडावळ
दर वर्सा माडियेक थावन फेस्ता मेरेन सगळी बरी मांडावळ पळेवंक मेळटा. तांतूंत गोंयचे पवित्र सभेचे व्हडील, बाँ जेजूस बाजिलिकेचे व्हडील, लागू जातल्या सरकारी खात्यांचे व्हडील, पुलीस, उजो पालोवपी दळ, वैजुकी खातें मेळून वावुरतात. तांकां सांगात दितात ते गोंयभरच्यान आपले खोशेन आयिल्ले शंभरांनी आपवावुरपी. खूब जणांक कास्तीग पडटा, पूण कोण पिरंगना हें देवाचें बेसांव. असलीच गजाल आमी फाटल्या वर्सा पळेल्ली जेन्ना गोंयच्या सायबाचे कुडीची दाखवण जाल्ली. देस- विदेशांतलो लाखांनी लोक सायबाचें दर्शन घेवन गेले आनी कसलीच वयर- सकयल घडणी घडली ना. कित्याक तो सां फ्रांसीसाचो भावार्थ, जो मनीसकुळाक गुंथून हाडटा, विज्मितांनी दाखयता. इतल्या लोकाक बरे भशेन सांबाळप, तांतूंत मदीं दुयेंत, दिव्यांग, जाण्ट्या लोकाक गरज तशी सेवा दिवप म्हणल्यार फकांडांची गजाल न्हय. ही मांडावळ बरे भशेन सांबाळपी सगळ्या आपवावुरप्यांक आनी अधिकाऱ्यांक चेपें काडूंक फावो.
सायबाचो भावार्थ
सां फ्रांसीस तसो स्पेनाक जल्मलो आनी पाप सायबाचो दूत जावन गोंयांत आयलो. तो चड काळ हांगा वावरूंक ना. पूण जितलो रावलो त्या काळांत ताणें गोंयांत भावार्थाचें बीं रोयलें जें गोंयकारांच्या काळजामनांत पेरून उरलें. चिनाच्या शांगचुआन जुंव्यार तो संवसारांत अंतरलो तरी ताची रगतान भरिल्ली कूड निमाणी गोंयांत पावली, जी आजून आमचे नदरे मुखार आसा, होच सायबाचो भावार्थ सगळ्यांक बांदून दवरता.
सोंपयतना…
भावार्थ प्रगट करूंक खुणेची गरज आसना. तो भावार्थ्यां मदें उफाळून येता. ल्हानपणांतल्यान आतां 75 वर्सांचो जाला तरी दर वर्सा नुवें थावन ओल्ड गोवा चलून वचपी पियेदाद कॉस्ता म्हणटा, हो म्हज्या गोंयच्या सायबा काळावेलो थीर भावार्थ जो म्हजी भलायकी सांबाळटा आनी भक्तिवंत जिवितांत म्हाका धीर दिता. अशे गोंयच्या भोंवतणच्या वाठारांतल्यानूय भावार्थी सायबाच्या पांयां कडेन चलून येतात. अशे तरेचो भावार्थ आमच्यांत आसा काय? इल्लेशें मंथन करुंया.
—-
विन्सी क्वाद्रूस, राय, साश्ट,
9822587498
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
