‘किंग कोहली’ आनी ‘हिटमॅना’चेर भिस्त

भांगरभूंय | प्रतिनिधी

भारतीय पंगड आयज दक्षीण आफ्रिका पंगडा आडची दुसरी वन डे मॅच खेळपाक सज्ज आसा. माळ जिखपाची भिस्त ही विराट कोहलीच्या उत्कृश्ट फॉर्माचेर आनी रोहित शर्माच्या दमदार उपस्थितीचेर आसतली.

रांचीत जाल्ले पयले वन डे मॅचींत कोहलीच्या 52व्या शेंकड्या नेटार आनी रोहितान केल्ल्या 57 धांवड्यांचे आक्रमक खेळीक लागून भारताक 17 धांवड्यांनी जैत फावो जाल्लें.

​कोहली-रोहित: 2027चे संवसारीक सर्तीचे मुखेल दावेदार
​फुडली संवसारीक वन डे क्रिकेट सर्त सुरू जावपाक आनीक दोन वर्सांचो कालावधी आसा, ताका लागून दरेक मॅच ही कोहली आनी रोहिता खातीर तंदुरुस्ती आनी फॉर्म सिद्ध करपाची संद थारता.
मुख्य प्रशिक्षक गौतम गंभीर हांचे कडेन वाडत आशिल्ल्या मतभेदांचे चर्चेक लागून पंगडाच्या वातावरणाचेर लेगीत प्रस्न उप्रासपाक लागल्यात. ह्या प्रकरणांत बीसीसीआयक हस्तक्षेप करचो पडटलो अशें कांय जाणकार उलोवपाक लागल्यात. फाटल्या दोन मॅचींनी केल्ल्या प्रदर्शनांच्या नेटार हे दोनूय दिग्गज दक्षीण आफ्रिकेंत जावपी संवसारीक सर्ती खातीर मुखेल दावेदार थारल्यात. रोहिताच्या उत्कृश्ट प्रदर्शनाक लागून भारतान ऑक्टोबरांत सिडनींत जाल्ले वन डे मॅचींत ऑस्ट्रेलिया पंगडाक 9 विकेटींनी हारायिल्लो.

निवड समितीचे मुखेली अजीत आगरकर आनी गंभीर हांणी संवसारीक सर्तींत कोहली आनी रोहित हे खेळटले काय ना हे विशीं कांयच भाश्य करूंक ना.

मदले फळयेंत प्रयोग, पंगडाचो नवो हुस्को
पयली मॅच जिखली आसली तरी, भारताची समस्या कायम आसा. लिस्ट ए क्रिकेटींत उत्कृश्ट कामगिरी करून लेगीत ऋतुराज गायकवाड चवथे सुवातेर बॅटींग करतना सहज दिसूंक ना. हंगामी मुखेली लोकेश राहुल सवे सुवातेर बॅटिंगेक आयिल्लो. वॉशिंग्टन सुंदराक वेगळेवेगळे सुवातेर बॅटींग करपाची संवय जाल्या.
कोलकाता टॅस्टींत तिसरे सुवातेर खेळ्ळ्या उपरांत ताका पयले वन डे मॅचींत पांचवे सुवातेर बॅटींग करपाक धाडिल्लो. पूण, ताका व्हड धांवसंख्या करपाक जमूंक नाशिल्ली. तशेंच फक्त तीन ओव्हरी घालतना 18 धांवड्यो दिल्ल्यो.
हर्षित राणान नवीन बॉलाचेर दोन विकेटी घेतल्यो. पूण, ते उपरांत ताणें खूब धांवड्यो दिल्यो.
आयसीसीच्या नवीन बॉलींग नेमा प्रमाण 34वे ओव्हरी उपरांत फक्त एकूच बॉल वापरपाक मेळटा. ताका लागून आपले लायन लॅंथीचेर अदीक नियंत्रण मेळोवचें पडटा.

​कुलदीप यादवान 68 धांवड्यो दीत 4 विकेटी घेतल्यो. तो म्हारगो थारलो आसल्यो तरी ताचे विवीधतायेक लागून दक्षीण आफ्रिकेक मॅचींत पुनरागमन करपाक अपेस आयलें.

दक्षीण आफ्रिकेचें पुनरागमन आनी पंगडाची ताकद
11 धांवड्यांचेर तीन विकेटी व्हगडायल्या उपरांत दक्षीण आफ्रिकेन उत्कृश्ट पुनरागमन केलें. मार्को यानसेनान 26 बॉलांनी अर्द शेंकडो मारलो आनी 39 बॉलांनी 70 धांवड्यांची खेळी केली.

पदार्पण करपी मॅथ्यू ब्रित्झकेन भारता आडचे आपले पयले वन डे मॅचींत 72 धांवड्यांची भर घाली. मुखेली टेम्बा बावुमा आनी स्पिनर केशव महाराज हांकां पयले मॅची खातीर विसव दिल्लो. दुसरे मॅचींत ते खेळटले, ताका लागून पंगड आनीक घटमूट जातलो.

खेळपट्टी कशी अासतली?
​शहीद वीर नारायण सिंह स्टेडियमाचेर निमाणी वन डे मॅच जानेवारी 2023त जाल्ली. त्या वेळार मोहम्मद शमी आनी मोहम्मद सिराज हांचे भेदक बॉलिंगे मुखार न्युझिलॅण्डाचो डाव फक्त 108 धांवड्यांचेर सोंपिल्लो. भारतान 30 ओव्हरी आनी 8 विकेटी राखून जैत जोडिल्लें. डिसेंबर 2023त भारतान ऑस्ट्रेलिया पंगडा आडचे टी-20 मॅचींत 20 धांवड्यांनी जैत जोडिल्लें.