भांगरभूंय | प्रतिनिधी
शिरदोण दर्यादेगे वेलें टोळी झूज प्रकरण
पणजी: शिरोदण दर्यादेगेर 2009 वर्सा नावाडगो गुंड जेनिटो कार्दोझ हाचेर हल्लो केल्लो. ह्या प्रकरणांत सत्र न्यायालयान दुबावीत सचीन पाडगांवकार आनी प्रसाद कुबल ह्या दोगांक दिल्ली चार वर्सांची कश्टाची ख्यास्त मुंबय उच्च न्यायालयाच्या गोंय खंडपिठान कायम दवरिल्ली. ही ख्यास्त सर्वोच्च न्यायालयान स्थगीत दवरल्या.
शिरदोण दर्यादेगेर खुनाची घडणूक 10 मे 2009 दिसा घडिल्ली. जेनिटो कार्दोझ आनी ताचे वांगडी महावीर नाडर, डॉम्नीक नाझारेथ तांचो प्रतिस्पर्धी मिरांड टोळये कडेन वाद जालो. ह्या वेळार दोनूय गटांतल्या वांगड्यांनी एका शॅका कुशीक एकामेकांचेर कवचेच्यो बाटल्यो आनी चाकवान हल्लो केल्लो. ह्या टोळी झुजांत दुसऱ्या टोळीचे वांगडी संतोष कालेल आनी फ्रान्सीस मॅन्युएल डिसोझा उर्फ मिरांड हांकां मरण आयिल्लें.
ह्या प्रकरणांत जेनिटो कार्दोझ आनी हेरांचेर खुनाचो आरोप दवरिल्लो. म्हापशेंच्या अतिरिक्त सत्र न्यायालयान सदोश मनीसवधाच्या आरोपा खाला ताका दोशी थारायलो आनी तीन वर्सांची कश्टाची ख्यास्त दिली. ही ख्यास्त गोंय खंडपिठान कायम दवरली. ताका जेनिटोन सर्वोच्च न्यायालयांत आव्हान दिले उपरांत न्यायालयान स्थगीत दवरली. जाल्यार त्या वेळार मिरांड हाचे टोळयेंतलो दुबावीत सचीन पाडगांवकार आनी प्रसाद कुबल आनी हेरांनी जेनिटो कार्दोझ हाचेर हल्लो केल्ल्या प्रकरणांत सत्र न्यायालयान चार वर्सांची कश्टाची ख्यास्त दिल्ली.
ही ख्यास्त गोंय खंडपिठान कायम दावरिल्ली. हे ख्यास्तीक दुबावीत सचीन पाडगांवकार आनी प्रसाद कुबल ह्या दोगांनी सर्वोच्च न्यायालयांत आव्हान दिलें तेन्ना, न्यायालयान वयली ख्यास्त स्थगीत दवरली.
दुबाविता वतीन अॅड. रोहन देसाय हांचे सयत अॅड. अॅड. प्रणव पाठक, दीपक जोशी, संजय शर्मा आनी शिवम यादव हांणी युक्तीवाद केलो.
न्या. संजय करोल आनी न्या. नोंगमीकापम कोतीश्वर सिंग हांच्या दोन वांगडी न्यायपिठान हो आदेश दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
