भांगरभूंय | प्रतिनिधी
दिसाक सरासरी 4 दुयेंती; दोन वर्सांत 5 टक्क्यांनी वाड
पणजी: फाटल्या कांय वर्सांत गोंयांतल्या कांक्र (कॅन्सर) दुयेंती मदीं सेगीत वाड जायत आसा. गोंयांत 2022 ते 2024 मजगतीं कांक्राचे 5218 दुयेंती सांपडिल्ले. हाचोच अर्थ म्हयन्याक सरासरी 145 जाल्यार दिसाक सरासरी चार दुयेंती सांपडिल्ले. दोन वर्सांत कांक्र दुयेंतींची संख्या 4.88 टक्क्यांनी वाडल्या. केंद्रीय भलायकी राज्यमंत्री प्रतापराव जाधव हांणी राज्यसभेंत दिल्ले लेखी जापेंतल्यान ही म्हायती मेळ्ळ्या. हे विशीं खासदार नीरज शेखर हांणी अतारांकीत प्रस्न विचारिल्लो.
जापेंत दिल्ले म्हायती प्रमाण, गोंयांत 2022 वर्सा क्रांकाचे 1700 दुयेंती सांपडिल्ले. 2023त 1735 दुयेंती सांपडले. जाल्यार 2024त ही संख्या वाडून 1783 जाली. वयल्या काळांत पुराय देशांत कांक्राचे 44.91 लाख दुयेंती सांपडिल्ले. म्हणल्यार म्हयन्याक सरासरी 1.24 लाख जाल्यार दिसाक सरासरी 41 हजार दुयेंती सांपडिल्ले.
2022चे तुळेन 2024त देशांतल्या कांक्र दुयेंतींची संख्या 4.90 टक्क्यांनी वाडली. वयल्या काळांत उत्तर प्रदेशांत सगल्यांत चड 6.46 लाख दुयेंती सांपडिल्ले.
हाचे उपरांत महाराष्ट्रांत 3.72 लाख, अस्तंत बंगालांत 3.47 लाख जाल्यार बिहारातं 3.26 लाख दुयेंती सांपडिल्ले. वयल्या काळांत सिक्कीम राज्यांत सगल्यांत उणें म्हणल्यार 1582 दुयेंती सांपडिल्ले. मणिपूर, नागालॅण्ड, अरुणाचल प्रदेश, मेघालय ह्या राज्यांनी दुयेंतींची संख्या तुळेन उणीं आशिल्ली. केंद्र शासीत प्रदेशांत दिल्लींत सगल्यांत चड 82 हजार 683 दुयेंती सांपडिल्ले. जाल्यार लक्षद्वीपांत सगल्यांत उणें म्हणल्यार 91 दुयेंती सांपडिल्ल्याचें जापेंत म्हणलां.
केंद्र सरकाराच्यो विवीध संस्था कांक्र दुयेंसाचेर संशोधन करीत आसात. राष्ट्रीय असंसर्गजन्य दुयेंस नियंत्रण प्रकल्पा खाला केंद्रा वतीन सगल्या राज्य सरकारांक तांत्रीक आनी अर्थीक मजत करतात. ते प्रमाण देशांत 770 जिल्हो हॉस्पिटलांत उबारल्यांत तशेंच किमोथेरेपी घेतिल्ले दुयेंती खातीर 364 केंद्रां सुरू केल्यांत.
आयुष्यमान भलायकी मंदीर येवजणे खाला निरोगी आयुश्याचो पुरस्कार करतात. देशांत जन वखदी केंद्रांत कांक्र दुयेंसा वेलीं वखदां 50 ते 80 टक्के उण्यांत मोलांत उपलब्ध करून दीत आशिल्ल्याचें जापेंत म्हणलां.
गोडेंमुताचे संख्येंत एका वर्सांत 8 टक्क्यांनी वाड
राज्यसभेंतल्या आनीक एका प्रस्नाचे जापेंतल्यान मेळिल्ले म्हायती प्रमाण, गोंयांत दोन वर्सांत गोडेंमूत दुयेंतींची संख्या 8.17 टक्क्यांनी वाडल्या. 2023-24त तपासणी केल्ल्या 66 हजार 908 दुयेंती पैकीं 13 हजार 475 जाणांक (20.13 टक्के) गोडेंमुताचें दुयेंस आशिल्लें. 2024-25त 81 हजार 907 दुयेंतींची तपासणी केल्ली. हातूंत 23 हजार 186 जाणांक (28.30 टक्के) गोडेंमुताचें दुयेंस आशिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
