भांगरभूंय | प्रतिनिधी
कॉंग्रेसीन विस्वासघात केल्ल्याचो आरजीचो आरोप
पणजी : जिल्लो पंचायत वेंचणुके खातीर ११ उमेदवारांची पयली वळेरी कॉंग्रेसीन जाहीर केल्या उपरांत विरोधी आघाडींत इबाड निर्माण जाला. युतीची उलोवणी सुरू आसतना कॉंग्रेसीन काळखांत दवरून उमेदवार जाहीर केल्ल्यान आरजीन खंत उक्तायल्या. कॉंग्रेसीन विस्वासघात केल्ल्याचो आरोप आरजीचे मुखेली मनोज परब हांणी केला. आरजीन नाराजी उक्तायल्ल्यान विरोधी आघाडी जावचे पयलींच तुटपाचे वाटेर आसा.
येत्या २० डिसेंबराक जावपी जिल्लो पंचायत वेंचणुके खातीर आचारसंहिता जाहीर जाले उपरांत राजकी पक्षां कडल्यान उमेदवार निवडीक नेट आयला. भारतीय जनता पक्षान मगोकडेन युती जाहीर करतनाच १९ उमेदवारांची पयली वळेरी जाहीर केल्या. आम आदमी पक्षान लेगीत २९ उमेदवार जाहीर केल्यात. भाजपाक हारावपा खातीर कॉंग्रेस, आरजी आनी गोवा फॉरवर्ड ह्या तिनूय विरोधी पक्षांची उलोवणी बरेच दिस सुरू आसा. जागा वाटपा विशीं एकमत जाय नाशिल्ल्यान युती विशीं निर्णय घेवपाक आजून मेरेन येस येवंक ना. तशेंच युती जाल्यार कॉंग्रेसी परस आरजीक आनी गोवा फॉरवर्डाक चड लाव जातलो, म्हूण युतीक कॉंग्रेस कार्यकर्त्यांचो विरोध आसा. चडशा कार्यकर्त्यांचो विरोध आसून लेगीत भाजपाक हारावपा खातीर गोवा फॉरवर्ड आनी आरजी कडेन युती करपाक वेंचणूक समितीची पसंती आसा. जाग्याविशीं एकमत जाय नाशिल्ल्यान विरोधकांचे युतींत आडखळी येतात. हे फांटभुंयेर कॉंग्रेस समितीची सोमारा रातीं बसका जावन तांणी पयली वळेरी जाहीर केली.
कॉंग्रेस उमेदवारांची पयली वळेरी
उत्तर गोंय
कळंगुट – कॅमेलीना फर्नांडीस (बायलां)
सुकूर – साहिल मांद्रेंकार (सर्वसामान्य)
रेईश मागूश – सोनल मालवणकार (बायलां)
ताळगांव – विजू दिवकार (एसटी)
चिंबल – ऍड. शेजल कळंगुटकार (बायलां)
पाळी – भानुदास दत्ता सोननायक (ओबीसी)
केरी – आयुश सिताराम केरकार (एससी)
दक्षीण गोंय
उजगांव – गांजे – मनिशा उजगावकार
वेळ्ळी – ज्युलीओ फर्नांडीस
कुडतरी – अलेक्सिनो दासिल्वा
सावर्डे – राजेंद्र शिरोडकार
कॉंग्रेसी कडल्यान विस्वासघात
आरजीक काळखांत दवरून उमेदवारांची वळेरी जाहीर करून कॉंग्रेसीन आरजीचो विस्वासघात केला. जे जागे आरजीन मागिल्ले ते जाग्यांचेर कॉंग्रेसीन उमेदवार जाहीर केल्या. युती मोडली जाल्यार आरजीचो दोश आसचो ना, अशें आरजीचे मुखेली मनोज परब हांणी म्हणलां.
युतीविशी निर्णय घेवपा खातीर आरजीची आयज सांजे बसका जातली, अशें मनोज परब हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
