भांगरभूंय | प्रतिनिधी
विद्यार्थ्यांच्या उणावाक लागून 47 सरकारी शाळा बंद
पणजीः गोंयांत 110 सरकारी शाळांनी 10 परस उणीं भुरगीं शिकतात आनी हे शाळेंतल्या विद्यार्थ्यांक शिकोवपा खातीर 200 शिक्षक आसात. ते भायर विद्यार्थ्यांचो आंकडो शुन्य जाल्ल्यान फाटल्या स वर्सांत 47 सरकारी शाळा बंद पडल्यात. गोंयांत 40 हजारा परस चड भुरगीं सरकारी शाळांनी शिकतात.
केंद्रीय शिक्षण मंत्री धर्मेंद्र प्रधान हांणी लोकसभेंत दिल्ले लेखी जापेंत सांगलां, शिक्षण हो राज्याचो विशय आशिल्ल्यान चडश्यो शाळा हो राज्याच्या प्रशासकी नियंत्रणा खाला येतात. शिक्षकांची नेमणूक करप, ताका वेतन दिवप, तशेंच तांचे संख्येचें प्रमाण थारावप हो सगलो निर्णय राज्य सराकारचो आसता. केंद्र सरकार फक्त केंद्रीय येवजण जशें, समग्र शिक्षा अभियाना खाला विद्यार्थी शिक्षका प्रमाण स्थीर दवरपा खातीर अर्थीक मजत दिता.
फाटल्या तीन वर्सांनी विद्यार्थी उणें जावपी सरकारी शाळांनी सेगीत वाड जायत आसा. मात दुसरे वटेन उणें विद्यार्थी आशिल्ल्या सरकारी शाळांनी शिक्षकांचे संख्येंत वाड जाता.
वर्स 2022-23त गोंयांत 10 परस कमी विद्यार्थी संख्या आशिल्ल्यो 106 शाळा आशिल्ल्यो. उपरांत वर्स 2023-24त विद्यार्थ्यांचो आंकडो उणो जावन शाळांचो आंकडो 108 मेरेन वाडलो आनी वर्स 2024-25 हो आंकडो परतून वाडला आनी आतां मेरेन 110 शाळांनी 10 परस कमी विद्यार्थी आसात.
मजगतीं, शाळांनी विद्यार्थ्यांची संख्या कमी जायत आसतना हे उणें विद्यार्थ्यी आशिल्ले शाळेंत शिक्षकांचें प्रमाण वाडटा. 10 परस उणे विद्यार्थी आशिल्ले शाळेंत वर्स 2022-23त 152 शिक्षक आशिल्ले, उपरांत 2023-24त हो आंकडो मात्सो उणो जावन 146 शिक्षकां मेरेन पावलो. वर्स 2024-25त ह्या आंकड्यांत व्हड वाड जावन 200 मेरेन शिक्षक आतां मेरेन शिकयतात.
मजगतीं, फाटल्या स वर्सांच्या काळांत विद्यार्थ्यांच्या उणावाक लागून 47 सरकारी शाळा बंद पडल्यात. जाल्यार फाटल्या एका वर्साच्या काळांत 9 सरकारी शाळा बंद पडल्यात. वर्स 2019-20सात 827 सरकारी शाळा आसल्यो आनी 6 वर्साच्या काळांत हातूंत उणाव जावन वर्स 2024-25त हो आंकडो 780 मेरेन पावलो. जाल्यार वर्स 2023-24त शाळांचो आंकडो 789 आसलो आनी वर्स 2024-25त हो आंकडो 780 मेरेन पावला.
गोंयांतल्या सगल्या सरकारी शाळांनी ह्या वर्सा 41,217 भुरगे शिक्षण घेतात. तातूंतले 3470 अल्पसंख्याक विद्यार्थी, 6719 एसटी विद्यार्थी आनी 1419 एससी विद्यार्थी आसात.
–
गोंयच्या सरकारी शाळांचो आंकडो
वर्स : शाळा
2019-20 : 827
2020-21 : 821
2021-22 : 814
2022-23 : 806
2023-24 : 789
2024-25 : 780
सरकारी शाळेंतल्या भुरग्यांचो आंकडो
उत्तर गोंय
एससी विद्यार्थी- 780
एसटी विद्यार्थी- 763
अल्पसंख्याक- 1596
वट्ट- 20590
दक्षीण गोंय
एससी विद्यार्थी- 759
एसटी विद्यार्थी- 5956
अल्पसंख्याक- 1874
वट्ट- 20627
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
