भांगरभूंय | प्रतिनिधी
मडगांव: नेसाय हांगासरल्या उद्देगीक वसणुकेंतल्या केमटेक ह्या नितळसाणेच्या प्रॉडक्टस तयार करपी कंपनींच्या युनिटाक उजो लागिल्ल्याची घडणूक घडली. ह्या उज्यांत लाखांनी रुपयांचें लुकसाण जालां. मडगांव उजो पालोवपी दळान उज्याचेर नियंत्रण मेळयलें आनी सुमार 10 लाखांची मालमत्ता वाटायली. उजो लागपाचें कारण मात समजूंक शकलें ना.
सां जुझे दी आरीयाल हांगासरले नेसाय उद्देगीक वसणुकेंतल्या केमटेक ह्या कंपनीच्या युनिटाक उजो लागपाची घडणूक घडली. ही कंपनी टर्पेटायन ऑयल, थिनर, वॉर्नीश, लिक्वीड साबण, फ्लोर क्लिनर बी नितळसाणे विशींच्या उत्पादनांची निर्मिती करता. ह्या कंपनीच्या युनिटाक हो उजो लागिल्लो. हातूंत लाखांनी रुपयांचें लुकसाण जालां. नेमको लुकसाणेचो आंकडो अजून समजूंक ना. तशेंच उजो लागपाचें कारण लेगीत स्पश्ट जाल्लें ना.
नेसायचे कंपनीक उजो लागिल्ल्याची म्हायती दनपारां साडेतीन वरांच्या सुमाराक मेळ्ळी. ह्या कंपनीची दोन युनिटां आसात. हातूंतल्या एका युनिटांत सोडियम सल्फेट, सोडियम मेटासल्फेट आनी हेर कच्चो म्हाल तांणी पयल्या माळ्यार सांठोवन दवरिल्लो. मशिनाक उजो लागले उपरांत हो उजो हेर कडेन पातळ्ळो. ह्या उज्यांत नितळसाणेची उत्पादनां तयार करपा खातीर हाडिल्लो कच्चो म्हाल प्लास्टिकाच्या बाटल्यांनी आशिल्लो. हो म्हाल उज्यांत लासून गेलो अशी म्हायती उजो पालोवपी दळान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
