भांगरभूंय | प्रतिनिधी
राज्य युवा महोत्सवाक सुरवात
पणजी: खंयचीय सर्त सेगीत चालू उरत जाल्यार स्पर्धकाक आपूण खंय आसा हें लक्षांत येता. तरणाट्यांक हे सर्तींतल्यान आपली कला, कुशळटाय दाखोवपाची संद मेळटा अशें खेळां मंत्री रमेश तवडकार हांणी सांगलें.
ते खेळां आनी युवा वेव्हार संचालनालयाच्या राज्य युवा महोत्सवाच्या उक्तावण सुवाळ्या वेळार उलयताले.
विकसीत भारताचें सपन साकार करपा खातीर आयच्या तरणाट्यांची भुमिका स्पश्ट करपाची आपली तयारी आसूंक जाय. तरणाटो उर्जेन भरिल्लो आसता. तांणी आपली शक्त आपल्या ताकदीचो वापर देश हिता खातीर वा बऱ्या कामा खातीर करचो. हे खातिरूच अशे उपक्रम चालीक लावपाचो आमचो उद्देश आसता अशें तवडकार हांणी म्हणलें.
खेळां आनी युवा वेव्हार संचालनालय गोंय सरकार आनी युवा वेव्हार आनी खेळां मंत्रालय भारत सरकार हांच्या पालवान पणजेंत 22वो राज्य युवा महोत्सव 2025 खाला विकसीत भारत यंग लिडर 2025-26 ह्या उपक्रमाचो शुभारंभा काल (सोमारा) कला अकादमींत सुरू जालो. दोन दीस चलपी ह्या महोत्सवाक गोंयचे माध्यमीक आनी उच्च माध्यमीक विद्यालयांतले तरणाटे, तरणाट्यो हांणी व्हड उत्साहान सहभाग नोंद केला.
महोत्सवाच्या पयल्या दिसा 1 डिसेंबर 2025 दिसा लोकनाच (समूह) उलोवपाची सर्त (डेक्लेमेशन) फोटोग्राफी, रांगोळी तशेंच दोन दीस चलपी विज्ञान मेळाव्याचें आयोजन केलां. तशेंच तशेंच 2 डिसेंबर 2025 दिसा लोकगीत (समूह), कथा लेखन, कविता लेखन आनी चित्रकला ह्या सर्तीचें आयोजन केलां.
ह्या वेळार खेळां खात्याचे सचीव संतोष सुखदिवे, संचालक अजय गावडे, उपसंचालक विवेक पवार, पांडुरंग नायक बी मानेस्त हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
