विद्यार्थ्यांनी समाजाक आत्मविस्वासान जोडचे

भांगरभूंय | प्रतिनिधी

पेडणें : विद्यार्थ्यांनी समाजाक आत्मविस्वासान जोडचे. एमएसएस सारके माचयेचो स्वताचे उदरगती खातीर वापर करचो, अशें धारगळचे सरपंच अर्जुन कानोळकार हांणी सांगलें.

आसगांवच्या ज्ञानप्रसारक मंडळाचे म्हाविद्यालय आनी संशोधन केंद्र हांच्या एनएसएस विभागाचें 8 दिसांचें विशेश शिबीर धारगळच्या श्री शांतादुर्गा देवस्थान संकुलांत जालें. ताचें उक्तावण केले उपरांत कानोळकार उलयताले. ह्या शिबिराचो उद्देश विद्यार्थी आनी समाजा मदीं दुवो निर्माण करचे खातीर तशेंच विद्यार्थ्यांचे सर्वांगी उदरगतीक चालना दिवचे खातीर आयोजीत केल्लें.

थळावे पंच सतीश धुमाळ मुखेल सोयरे म्हूण हाजीर आशिल्ले. तांणी आपल्या उलोवपांत तरणाट्यां मदीं नेतृत्वगूण विकसीत करपाचेर भर दिलो. तशेंच समाजांत दिलपी समस्यांचेर आवाज काडून त्यो सोडोवपाचो यत्न करपाचो उलो मारलो.

मशाल यात्रेन शिबिराची सुरवात जाली. ह्या निवासी शिबिरांत आपवावुरप्यांनी समाज आनी गांवांतल्या लोकांक जोडपी विवीध उपक्रमांत वांटो घेतलो, पुराय देवस्थान संकुलाची नितळसाण केली. तशेंच झाडांचे रोंपे लावन रोंयले आनी थळावे नितळसाण मोहिमेंत वांटो घेतलो. जनजागृतीचो भाग म्हूण आपवावुरप्यांनी धारगळच्या म्हत्वाच्या तिस्कांचेर आनी बाजारपेठेंत रस्ते सुरक्षा विशयाचेर रस्तोनाट्य सादर केलें. पर्यावरण जागरुकते खातीर कागदी पोतयो वांटल्यो. तशेंच धारगळच्या लोकशिक्षण हायस्कुलांतल्या विद्यार्थ्यां खातीर प्रतीक कोरकणकार हांणी सायबर गुन्यांव प्रतिबंधक सत्र घेतलें.

मंदीर समितीचे मुखत्यार राज खलप हांणी क्रॅडीट कार्ड वापराचेर मार्गदर्शन केलें. विमो मळा वयले करिअर संदी संबंदांत वरिश्ठ विमो सल्लागार प्रदीप जोशी हांणी म्हायती दिली. गोवा चेंबर ऑफ कॉमर्स, म्हापशें युनिटा वतीन गिरायक संरक्षण जनजागृती सत्र आयोजीत केलें. सतीश सावंत हांणी आपवावुरप्यांक स्वसंरक्षण तंत्र शिकयलें. युवा फुडारी वल्लभ बर्वे हांणी कार्यवळ वेवस्थापन कुशळटायेचेर कार्यशाळा घेतली. देवस्थान सभाघरांत जाल्ले कार्यावळींत शिबिराचो समारोप जालो. मंदीर समितीचे वांगडी प्रकाश गवंडळकार हे मुखेल सोयरे म्हूण हाजीर राविल्ले. चंदू गोवेकार हांणी एनएसएस आनी शिबिराच्या उद्देशा विशीं म्हायती दिली. डॉ. धनीश कुमार हांणी उपकार मानले.