भांगरभूंय | प्रतिनिधी
चिंतन- 83
मायबापें जरी सर्पीण किं बोका ।
त्यांचे संगें सुखा न पवे बाळ ॥
तुकाराम महाराज म्हणटात — आवय सोरपा सारकी आनी बापूय बुकल्या भशेन आसल्यार भुरग्याक तांच्या सांगातांत सुख मेळना. कारण सोरोप आपल्या पिलांक गिळटा आनी बुकलो आपल्या पिलांचेर घुरी घालता. मोग आनी आदार दिवपी आवय- बापूय भंय आनी त्रासाचे कारण जाले जाल्यार मागीर भुरग्याच्या मनांतलो विस्वास मरता.
एक फावट शाळेंत एक ल्हानशी गजाल घडली. शिक्षकान विचारलें, “भुरग्यांनो, तुमकां आवडटा ती सुवात खंय आसा?” चडशीं भुरगीं म्हणालीं — “आवयची वेंग!” पूण एक भुरगो ओगी रावलो. विचारलें तेन्ना ताणें म्हणलें, घरांत सगळें बरें आसा, पूण आवय- बापूय दर दिसा झगडटात, देखून शाळेंतूच म्हाका बरें दिसता.” त्या खिणाक सगळ्यांक कळ्ळें — घर म्हणल्यार फकत वण्टींचें न्हय, तें मोगाचें आसूंक जाय.
केन्ना- केन्ना आवय-बापूय आपल्या भुरग्यांक मोगान न्हय, तर भंय घालून वाडयतात.
“शिक नाजाल्यार संवसार तुका खातलो!” “तुमी म्हजें आयकनात जाल्यार घरांतल्यान भायर सरात!” भुरगीं अशा उतरांनी वाडनात, भियेतात. आनी भियेवन वाडिल्लें भुरगें व्हड जालें तरी भितरल्यान मोडिल्लेंच उरता.
रमणाचो बापूय खूब कडक आशिल्लो. दरेक चुकी खातीर तो मारतालो, गाळी घालतालो, अपमान करतालो. हाका लागून रमणान अभ्यासांत प्रगती केली, पूण आत्मविस्वास उणो जालो. उपरांत जिणेंतल्या पयल्या अपेसाक तोंड दितना तो पुरायपणान कोसळ्ळो. कारण ताका घरांत शिकयल्लें — “चुकलें म्हणल्यार तूं वायट.”
पूण दुसरे वटेन कांय पालक खऱ्या अर्थान आपल्या भुरग्यांक ‘संस्कार’ दितात. म्हणजेच ते नेम घालतात, पूण तातूंत मोग आसता. देखीक- सचिन तेंडुलकराची आवय रजनीताई. पूत कितलोय फामाद जालो तरी घरांत सादें जेवण आनी सादी वागणूक. पूण ताचें दर एक पावल उर्बेन भरिल्लें आसता. देखूनच सचिन म्हणटा, “म्हजें बळगें म्हजी आवय.”
खरें म्हणल्यार पालकांचो राग, शिस्त, चुको सुदारप — हें सगळें चलता. पूण ताचे फाटल्यान ‘मोगाचें तापमान’ तिगोवन दवरपाक जाय.
तुकाराम महाराजांच्या ह्या अभंगांतलो संदेश स्पश्ट आसा —
पालकत्व म्हणल्यार भुरग्यांच्या मनाचो रक्षक जावप. पूण
तीच राखण जर भंय, उपेक्षा आनी खर उतरांनी केल्यार मागीर भुरग्याचें भुरगेपणूच शेणटा.
मोगाची ऊब आसता तेन्नाच, संगत सुखद जाता. आवय-बापायचे वागणुकेंत ‘सोरोप’ आनी ‘बुकलो’ न्हय, तर ‘माऊली’ आनी ‘विस्वास’ आसूंक जाय —
तेन्नाच भुरगेपण हें भांगरायुग थारता.
– ह भ प देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
