भांगरभूंय | प्रतिनिधी
वोटचोरयेचो व्हडलो बोवाळ जालो आनी मतदारांची तपासणी सुरू जाली. सध्या बिहारा उपरांत 12 राज्यांनी मतदारांची विशेश फेरतपासणी म्हणल्यार एसआयआर चलता. गोंयांत 10.55 लाख अर्ज संकलीत जाल्यात. चार दीस उरल्यात. 90 हजार मतदारांचे अर्ज परत आयल्यात. हातूंत दोट्टी मतदार, मेल्यात, घर बदल्लां वा अर्ज वांटपाच्या वेळार हाजीर नाशिल्ले तांचो आसपाव आसा. कोणाक चुकीचे पद्दतींत नांवां काडल्यांत अशें दिसता जाल्यार तीं 7 फेब्रुवारी मेरेन घालूं येतात. 9 डिसेंबराक मसुदो वळेरी जाहीर जातली. 2 लाख 20 हजार मतदारांचीं नांवां मॅपिंग जावंक नात. 2002 चे मतदार वळेरे कडेन तांची तुळा जातली. हातूंत दुसऱ्या राज्यांत, देशा भायर वचून राविल्ले गोंयकार आसूं येतात वा हांगा मतदान करपी स्थलांतरीतूय आसतले. सगल्यांक आपूण गोंयकार, भारतीय हे सिद्ध करचें पडटलें. वेंचणूक आयोग तांकां वैयक्तीक पत्रां धाडटलो. दिसाळ्यांनी जायरातीय येतल्यो. ह्या 2.20 लाख मतदारांक मतदान वळेरेंत नांव आसल्यार जिल्हो पंचायत वेंचणुकेंत मात मतदान करपाक मेळटलें.
मरपी मतदारांची नांवां वेंचणूक आयोगाक मेळनात काय? मागीर मरून दोन वर्सां जालीं तरी तांचें नांव वळेरेंत कशें उरता. 2002 उपरांत वळेरी अपडेट जावंक ना? गोंयांत, भारतांत दोट्टी मतदार आसात अशें काँग्रेस फुडारी राहुल गांधीन सांगलें तेन्ना ताका सगल्यांनी पिश्यांत काडलो, पूण जायत्या राज्यांनी बोगस मतदार मेळ्ळ्यात. हें आतां न्हय, तर पयलीं पसून चलता. बोगस मतदान ही आमची परंपरा. बिहार, युपींत 1990 च्या दशकांत मतपत्रिका घेवन दोगजाण एकाच पक्षाक मतदान करतना टिव्हीचेर दाखयिल्लें. ही भिरांकूळ परिस्थिती वेगळे पद्दतीन अजून चालू आसचीना कित्या वयल्यान? स्थलांतरीत आपल्या राज्यांत मतदान करतात आनी मागीर गोंयांतूय मतदान करतात, असो आरोप जाता. मॅपिंगा वेळार त्या राज्यांतलें ताचें नांव रद्द जातलें, गोंयांतलें उरतलें. पूण थंय वेंचणूक आसता तेन्ना गोंयांतलें नांव रद्द करून थंयचे वळेरेंत तें नव्यान घालचे नात, कित्या वयल्यान? ते खातीर पुराय देशांत एकाच वेळार वेंचणूक जावंक जाय. मतदान करता थंय चार पक्षाचे एजंट वळेरी घेवन बशिल्ले आसतात. तांकां बोगस कोण तें कळना? विदेशी, बोगस नांवां मतदार वळेरेंत आसात, हें सिद्ध जालें, जाल्यार तीं वळेरेंत भितर घालपी अधिकाऱ्याकूच पांच वर्सां भितर उडोवपाची तरतूद कायद्यांत जाय. भारतांत 99 कोटी 10 लाख मतदार आसात. तातूंतल्या 5 ते 10 कोटी मतदारांचे नोंदीचेर प्रस्न निर्माण जावंक शकतात. म्हणल्यार ते मेळनात, दोन कडेन मतदान करपी बी आसतले. हो आंकडो चड आसतलो, असो जाणकारांक दुबाव. तंत्रज्ञानाच्या युगांत अशें जावप हें लजेचें. उमेदवारा कडल्यान पयशे घेवन दोट्टी मतदान करप्यांकूय पांच वर्सां भितर उडोवंक जाय. उमेदवारा सयत!
गोंयची समाजवेवस्था, सैम बदलता. थोड्योच जमनी उरल्यात. आतां कांय म्हयन्यांनी उरल्यात त्या दोंगरांचेर हांवळ येवं येता. ओलसार जागो, व्हाळांनी इमारती उब्यो जावंक लागल्यात. गोंय वाटावपाक हें करूंक जाय, तें करूंक जाय, अशें सोशल मिडियाचेर सांगपी खूबजाण आसात. भितरले चडशे देशा भायले. आतां मॅपिंग जातलें तातूंतले देड लाख आनी एसआयआर अर्ज परत आयल्यात तातूंतले 50 हजार मतदार वळेरेंतल्यान भायर पडले जाल्यार सगल्याच वेंचणूक निकालाचेर परिणाम जातले. कारण हांगा 100 ते 700 मतांनी वेंचून येवपी आमदार आसात. सुवार्थी, आत्मकेंद्रीत मतदारांचो आंकडो वाडटा. हातूंत गोंयकारुय आसात. स्थलांतरीच चडूच वाडल्यार गोंयची भाशा, संस्कृताय, कला, सण, मानसिकताय सगलेंच बदलूंक शकता. जागे जायात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
