भांगरभूंय | प्रतिनिधी
पणजी : फाटल्या कांय दिसांत गोंयांतलें शीं वाडलां. गांवगिऱ्या वाठारांत शिंयाची खरसाण अदीक जाणवता.
24 वरांत पणजेचें उण्यांत उणें तापमान 1.6 अंशान उणें जावन 19 अंश सेल्सियस जालें. मुरगांवां उण्यांत उणें तापमान 20.6 अंश आशिल्लें. फुडले स दीस गोंयांतलें उण्यांत उणें तापमान 19 ते 20 अंश सेल्सियस मेरेन पावपाची शक्यताय आसा. हे मजगतीं फांतोडेर मध्यम स्वरुपाचें धुकें पडपाची शक्यताय आसा.
गोंयांत रातचें आनी फांतोडेर कुलकुल्याचें शीं जाणवता. फांतोडेर खूब कडेन धुकें पडटा. सकाळीं शिंया वांगडा शेळो वारो अणभवपाक मेळटा. अशें आसलें तरीय दनपारा उपरांत वताची रखरख वाडटा. आयतारा पणजे चडांत चड 32 अंश जाल्यार मुरगांवां 32.6 अंश सेल्सियस तापमानाची नोंद जाली. फुडले स दीस गोंयांतलें चडांत चड तापमान 32 ते 33 अंश सेल्सियस मेरेन आसपाची शक्यताय आसा.
हे आदीं 17 नोव्हेंबराक पणजे मोसमांतली सगल्यांत उण्या तापमानाची 19 अंश सेल्सियस नोंद जाल्ली. जाल्यार 18 नोव्हेंबराक 19.2 अंश, 11 नोव्हेंबराक 20.2 अंश, 12 नोव्हेंबराक 20.6 अंश सेल्सियसाची नोंद जाल्ली. गोंयांत नोव्हेंबरांतलें उण्यांत उणें तापमान सादारपणपणान 21 ते 22 अंशा मेरेन आसता. गोंयांत फाटल्या कांय वर्सांत नोव्हेंबराच्या निमाण्या आनी डिसेंबराच्या पयल्या सप्तकांत शिंयाची खरसाण वाडटा. मात जानेवारी उपरांत शिंयाची खरसाण उणी जाता. हे आदीं हवामान खात्यान नोव्हेंबरांत गोंयांतलें उण्यांत उणें तापमान सरासरी परस अदीक आसतलें, अशी शक्यताय उक्तायल्ली. अशें आसलें तरूय फाटल्या 15 दिसांत उण्यांत उणें तापमान सरासरी परस 1.5 ते 2.8 अंशान उणें जाल्लें. खात्यान 1 ते 3 डिसेंबर मेरेन मध्य प्रदेश, महाराष्ट्र, पंजाबच्या कांय वाठारांनी शिंयाच्या ल्हाराची शक्यताय उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
